O se saunoaga lea a le Minisita o Tupe, lea sa avea ma Minisita o le Punaoa Faale-Natura ma le Siosiomaga, le Afioga Faumuina Liuga ina ua fesiligia i le mafai ai e le popo i Samoa ona tali atu i lea manaoga tele o le suauu.
O le taimi lenei e lē o toe tau faamatalaina le tele o le tupe a le Malo o loo alu i tausaga uma auā le faatau mai ai o le suauu ae o le tulaga faaletonu o iai nei e lē o lava le suauu e gaosi i Samoa e mafai ai ona gaosi lava le suauu latou i lo tatou atunuu.
O le itu tāua e pei ona ta‘ua e le Afioga Faumuina Tiatia Liuga, o lea ua amata galuega a le Malosiaga tau Eletise. “Ua lua taavale a le EPC ia ua alu lava i le suauu o le popo ae o lea foi ua iai vaega o afi i Upolu ma Savaii ua mafai ona sui ai le suauu ua faatau mai i Fafo ma le Suauu popo lava ia,” o sana saunoaga lea i se fono ma tusitala i le vaiaso na tea nei.
“O se fuafuaga atonu e manatu nisi e maualuga tele pe a fua i le lava o le tali atu a Samoa ae o le itu tāua lava, ia tatou galulue faatasi.
E matuā moomia lava le popo e aoina mai – o le la e lalau a tatou toganiu ua matuā pae le popo ae e lē o iloga lava ona tali mai o tatou tagata i lenei polokalame tāua.”
Faaalia e le Afioga Faumuina Liuga e tatau ona oo atu i le tausaga e 2020 ua ola uma lava afi o le eletise mo le motu tele i Salafai mai i le suauu popo. E lē o lava le suauu popo o gaosi ona ua ave foi i fafo isi a tatou suauu popo ae e na o le tolu lava nofoaga i Samoa nei ua aoina le popo mago.
O le suauu popo o se tasi lea o auala ua saili ai le Malosiaga tau eletise ina ia maua mai ai le malosiaga e fesoasoani i le eletise. O le fale faamasino fou ua faapea ona faaaogāina ai le malosiaga o le lā ua faaola ai le fale atoa mo le eletise. O se tasi lenei o malosiaga faalenatura o loo tele i Samoa ma o loo faataitai i isi nofoaga ina ia mautu ai le maua mai o lea malosiaga i le taumafaiga lava e tuuitiitia le suauu faatau mai i fafo mo galuega faatino i totonu o le atunuu.
Faaalia e le Minisita o le Punaoa Faale-Natura ma le Siosiomaga i le taimi nei, le Afioga Faamoetauloa Dr Faale – e tāua foi le unai o le maua o le suauu popo mo malosiaga tau eletise auā na ia ta‘ua, o malosiaga nei ua saili i ai Samoa e lelei mo le Siosiomaga, e lē palapalā ma o le a umi ona faasaoina Samoa e lē gata i le itu tau tupe ae faapea foi i le itu tau i le saogalemu o le Siosiomaga pe a faamautu loa ana galuega ua faatino i le taimi lenei.
E lē o se galuega faigofie ae na ta‘ua e le alii Minisita o Tupe, a mafai e tagata Samoa ona toe tulai mai e ala lea i le la‘u mai o le popo mago i fale suauu popo i Upolu faapea ai Savaii, o le a telē le aogā ma tele se taimi e mafai ai ona ola Samoa i malosiaga nei e aunoa ma le toe faamoemoe i suauu taugata mai i fafo mo nei galuega.
