Ua faalauiloa i luga o faasalalauga i nusipepa se manaoga o le alii tautaua i le lakapi, o se tasi o toa manumanu a le Olopeleki, le alii o Jonah Lomu, ua sauni foi o ia e oso i totonu o le maea o faipelega.
Ua lona lua ai nei ia Lomu nisi o alii taaalo lakapi ua faia lenei fesuiaiga, o le suia mai le tamoe ma le polo lakapi, ae faamaulu meafaipele ma osooso i totonu o le maea.
Peitai o le tala mālie lea ua aave mai nei, ona o lenei fuafuaga a le alii o Lomu, ua ia ta‘ua ai o loo faasagasaga atu lana lu’i i se tasi foi o fetu ua amata ona pupula malosi a‘e i le lakapi iuni, ae o lea foi e avelua ma lana taleni fusu, le alo o Samoa ia Sonny Bill Williams.
O lenei faamoemoe o se polokalame e faia faaletausaga o loo faatāua ai le autū, Fight for Life i totonu o taaloga a le atunuu, lea na amata mai e se alii sa taalo muamua i le Kiwi, Dean Lonergan.
Ua atoa le lima tausaga e lei toe faia, ae iai le faamoemoe e tusa o le lipoti mai le Star-Times, o lea ua toe faatulaga nei, i se taimi o le amataga o le masina o Tesema o le a faataunuu ai i Aukilani, lea ua sauni ai nei Lomu e na te tatalaina le toe amataina o lea polokalame, i se la fusuaga ma Sonny Bill pe a manao ai Bill.
Ta‘ua i nei lipoti se faamatalaga mai le alii o Lomu, afai ae teena e SBW lana lu‘i, o le a agai atu loa e fusu ma se isi alii sa taalo lakapi liki talu ai nei, o Gorden Tallis lea na taalo i le laina i tua a le Kangaroos.
