Malo le tau, malo le faaeaea atunuu Alex!
Na matuai momoli mai e le alii o Alex le fiafia i loto ma agaga o le tapuaiga uma a Samoa i Brisbane i le tafa a‘e o ata i le taeao o le Aso Gafua ina ua māua le tala ua toe manumalo foi i le la taaloga ma le alii o Ohkello Peter i Jakarta.
Ua lē gata i le autapuai ae sili ai ona fiafia le aiga atoa, faapea nai ona mātua ia Faatau‘i ma Leitu Leapai, uso, tuafāfine ma fanau.
Na to‘ai taunuu mai le faigamalaga i fanua i le aoauli o le Aso Lulu a o tālia e le toatele o le Ekalesia LMS Pasefika, le susuga i le Toeaina ia Afoa Alapati ma le faletua ia Sarai Meatuaituuga faapea uo ma ē masani. O se feiloaiga o le fiafia ma le faafetai.
E ui i se umī sasa‘o o le aliiuli, peitai na saunoa Alex, na leai sona fefe e fetaui atu i le alii, o lona faatuatua tele na matuai talitonu ai e lei faailoga fesili na te mafaia ona faatoilalo le alii mai Uganda.
Ua na o le faafoi lava o le viiga i le Tamā o i le lagi ua mafai ai ona uli ma sao ma taunuu manuia le alofaiva o le alo saili malo o Samoa i lenei lava fa’agatama.
Ua iai le faamoemoe ua alo atu nei Alex e sauni mo le isi ana fusuaga i Kanata i le masina o Iuni pe afai e tusa ai ma le finagalo o le Atua e toe maua se fesootaiga lata mai i le taimi ma le aso.
Ua 5 nei fusi ua faamafana e le Lionheart – WBO,WBF World Boxing Foundation Australasian, OPPF o le fusi lea ua i Samoa ua avea ma souvernir ma teuina i le maota o nai ona mātua i Laulii, ua lē toe maua se isi e toe lu‘iina le Lionheart i lea fusi, faatasi ai ma fusi e 2 na manumalo ai talu ai nei, IBF-International Boxing Federation, Pan Pacific ma le WBA, Pan Africa.
O se tulaga alu alu pea i luma ma le finau malosi pe a maitau atu i le naunau ma le taumafai atili o le susuga ia Alex.
Na ia saunoa e lē mafai ona uma lona agaga fia faafetai i le tapuaiga a Samoa i soo se tafa o lenei lalolagi auā e mafua ona maua lona malosi ona o le mana o talosaga.
Na ia saunoa foi e lē o fusi e tāua ia te ia ae o loo iai lona faanaunauga ina ia tini lana tamoega i le iuga o faigamea ma le faatumutumuga o lona soifua taalo i le fusu, ma e iai le taeao e tino mai ai lana miti, i lona manatu “E leai se mea e faigata pe a iai le loto”.
Sa momoli le agaga faafetai o le susuga ia Faatau‘i Leapai, o le tuaa lea o Alex, na ia faapea mai ai: “Faamalo Samoa mo le tu‘iina o le mulipapaga, e faafetai atu i le aufaigaluega paia a le Atua, tamā ma tina matutua, ma soo se vaipanoa o taape ai le toto o Samoa, e lē lava upu o le gagana e momoli atu ai le agaga faafetai tele mai le ta‘ele o o matou loto.
E iai le faamoemoe e lē o le taunuuga lea poo le tini, peitai o se malaga faifai pea e moomia ai pea talosaga mōlia ina ia foai le malosi i le atalii aemaise nisi alo ma tamafanau a Samoa o saili malo i soo se atunuu ona o taleni ua tuuina i ai e le Atua.
Ia iai pea manuia o le Atua i luga o Samoa atoa ma atunuu i fafo o afifio ma papaaao ai le paia ma le mamalu o le atunuu.
Faafetai ma le faamalo i lenei nusipepa ua avea lava ma avefeau e faalealea atu ai le tagavai a Samoa e ana tamafanau aemaise o alaleo….faamalo mo tiute ma galuega lelei… soifua ma ia manuia, alofaaga mai ia Faatau‘i ma Leitu Leapai ma le fanau.”
