Radio Samoa: Faafetai i le Atua o lea ua maua mai le avanoa o le taitai o le Malo, le afioga i le Palemia. Avea ia lo‘u leo faatauvaa e fai ma fofoga taumomoli i Aotearoa nei, e faafeiloai atu i le agaga faaaloalo i lau afioga i le Palemia, lau susuga Tuilaepa Sailele Malielegaoi. Malo le soifua manuia.
Palemia: Ia faamalo atu foi i le valaau mai lenei itula afiafi. Ia ae sili ona faagasolo loa le ta talanoaga.
Radio Samoa: Malo faafetai. Ua atuē le taumafaiga a le Manu Samoa. Talitonu o lea ua i finagalo o le atunuu. Ia ae talitonu foi, faafetai i le Atua ua iu manuia.
Avatu ai foi le faamalo ma le faafetai i lau afioga i le Peresitene o loo taimatalii foi i le iuni lakapi a Samoa. E ui lava ina ua lē tau lau o le faamoemoe, ae talitonu o lea ua faamalieina lava le tapuaiga a le mamalu o le atunuu i tafa e fia o le kelope.
Ae talu ai ona o nisi o faafitauli o loo faapena ona fetosoa‘i faalaau mamafa foi i le mamalu o le atunuu, e pei o aiā foi a le IRB e pei o malologa a le ‘au, e 4 aso o loo malolo ai le tatou ‘au, ae ta‘i 8 isi ‘au.
Ma le isi tulaga faamolemole lau afioga Tuilaepa, e lē o auaoa i lau silafia, le tulaga o loo iai le atalii ia Eliota Fuimaono, ona o le tulaga o loo iai. Ae lelei lava le saunoa o lau afioga i le Palemia, se‘i faafofoga foi le mamalu o le atunuu, ma le agaga faaaloalo.
Palemia: Ua lelei. E masalo e tele foi upu i lenei mataupu ma ou te masalo e leai se mea e faaletonu ai foi le susuga ia Eliota, o la lava e faaali lona ia finagalo i le tulaga o le taaloga. Ia te au a la ia, e leai a se mea o le a soona lagalaga ai le IRB.
E iai a le aiā i tama taaalo latou e faaali ai o latou taofi. Ma o mea o finagalo faaalia, e tatau foi ona aogā i le IRB e matimati atili ai fuafuaga mo le taaloga i le agai atu i le lumanai.
E leai a la se mea o afaina ai le faaali saoloto o le finagalo o Eliota. Pau a le mea e pei e tau lē masani tagata i le tautala a se tama taaalo, ia ae faigata ona lē faaalia le finagalo.
I nei foi aso aemaise le saolotoga o le tagata ia e faaali lona finagalo saoloto. Ia o la‘u la lena vaaiga.
Radio Samoa: Malo faafetai. Ua māua foi, o lea foi e talanoa ai foi le mamalu o le atunuu, e pei ua māua mai foi le iuni lakapi, e lē o lagolagoina le atalii. E pei o le tulaga lena o lea ua fetosoa‘i ai faapa‘utolo a loi, i le mamalu o le atunuu ua feteenai ai foi lagona, e tatau ona lagolagoina e le iuni lakapi a tatou le faamoemoe o le atalii, mo le vaai mamao e pei ona saunoa ai lau afioga i le Palemia.
Palemia: O le tulaga lena. Ou te manatu foi, o le finagalo lea sa faaalia i faasalalauga mai foi a le iuni, ua ou te‘i ai foi a‘u.
Sa tatau foi ona iai se faautautaga foi a le iuni ia, auā e lei oo mai ia te au le mataupu. Masalo ua fai lava foi e le failautusi a le iuni ma faasalalau.
Ae o le tulaga lava ia, e lē tatau ona tetee le uluga i le faaaliga o le finagalo o Eliota.
Ou te fiafia a‘u leaga e tele mea faaletonu ia sa ou talanoaina foi e a‘u.
E iai foi la le faasalalauga lea masalo poo taeao e ono alu atu ai e le Malo, e faaopoopo atili ai i le faasalalauga muamua. Ia ae tatau a ona faaalia foi se manatu o le tatou foi Malo, masalo la e alu atu taeao i le nusipepa taeao.
O le tulaga lava ia, o le sese muamua a, o le tofi a‘e o lenei Uelese sa lē tatau ona alu ifo e fai le taaloga. O le tulaga faavalevalea muamua a lena, sa lē tatau ona tofi ifoa se Uelese.
E iloa lelei a, ua ou lē iloa poo ai le (…omit..) lea e faia nei ituaiga o filifiliga faavalevalea faapea, e tofi ane le Uelese e alu ifo e faafoe le taaloga, a o lea e faatalitali mai Uelese, o le alu i luga e faamoemoe i le faiaina o Samoa ia Aferika i Saute.
O se mea faavalevalea tele lea, o lea la o le a alu atu tonu ai le faasalalauga i le nusipepa foi a le tatou Malo, poo taeao poo tala atu taeao.
Radio Samoa: Malo lava faafetai i lau afioga i le Palemia. O lea lava ua e saunoa, e lagolagoina la le atalii e tusa ai foi ma le faamoemoe lea ua alo atu i ai, ia auā o lea faato‘ā feala mai le IRB, mai ia tausaga ua leva.
E pei lava o lea ua tatou silasila ma vaavaai mamao atu i ai, ia atonu e aogā mea tutupu, e maua ai foi so tatou fiafia i le lumanai.
O le ā la se fuafuaga a le iuni? O iai so tatou faamoemoe tatou te o e avatu so tatou faamoemoe mo le lumanai i le isi World Cup lea e sauna atu i le 2015, i le faiga o draws, ia e pei ona iai le malolo i le 4 aso, ma le malolo i le 8 aso.
O iai se finagalo i totonu o le iuni lakapi a Samoa, o iai se faamoemoe tatou te o i lea itu, faamolemole lau afioga i le Palemia.
Palemia: Manatua foi o la e iai le Samoa i totonu o le IRB.
E iai le tatou sui ia Lefau Harry, la e iai i totonu o le IRB. Ia te au la ia, e telē a le aogā o faasalalauga ia e fai. E lē faapea poo le feita poo le ā o le IRB, ae i le vaaiga faalemafaufau, e tatau ona vaai faalelei i mea ia e alu atu i taaloga ia, o inā e ta‘u mai ai e telē mea lea e faaletonu.
E leai la so‘u popole i le tulaga lena. E lē tau faailoa foi, ou te iloa foi, e telē a le avanoa e faasa‘osa‘o ai ni mea ia e lagalaga atu i finagalo o tagata, i le isi IRB lea o loo lumanai.
Radio Samoa: Malo faafetai. O le sailiga tupe a le Manu Samoa lau afioga i le Palemia, e pei ona iai, e pei ona silafia ai foi e le mamalu o le atunuu. Toe a o le ta mai o le logo, a o lea lava e saili se tatou tupe.
O iai se faamoemoe mo le isi 4 tausaga lea e tapenapena atu i ai le tatou iuni lakapi, ia aua ne‘i oo atu i le taimi e ta ai le logo, a o loo tau saili mai se tatou seleni, ma lo‘u agaga faaaloalo lau afioga i le Palemia?
Palemia: Masalo o le tulaga lena, e lē mafai lava ona alofia mea faapea. Auā e lē o taitai lava ona lava fesoasoani ia e aumai e le IRB. O lona uiga la, o le natura a o mea latou, pe oo atu lava i lena taimi e tatau a ona fai ni sailiga seleni.
Ae lē mafai foi ona tatou iloa, pe oo atu i ai, ua tele nisi kamupani alolofa e tuutuu mai o latou tau‘au e tauave faatasi le avega.
Radio Samoa: Ua maua se lipoti, ua sulufai atu nisi o ē sa galulue i le SamoaTel, e pei foi ona silafia o lea na faatau atu i le BlueSky. Ua faamuta le latou auaunaga, ia o loo manaomia se fesoasoani e pei ona sulufai atu i lau afioga i le Palemia.
O le ā le tulaga ua oo i ai nai ia tagata i le taimi nei, ia o loo moomia foi, pe mafai ona faamatuu mai a latou NPF, aemaise o latou nonogatupe i kamupani sa galulue ai, o lea e fia totogi a latou aitalafu, ma le agaga faaaloalo?
Palemia: O tulaga a na masani i mea nei o faalapotopotoga e faafoe kamupani tua.
Ua uma la ona fai faiga masani o le totogi o latou na ona ua lē o toe moomia e le kamupani. Ia o uiga a faapea, o mea na e tutupu, e lē toe mafai ona toe apaapa atu le Malo, o mea a ia e masani ona tutupu i mea o kamupani tua.
O le ala foi lena o lea e faamatuu ai e le malo i tua ana faalapotopotoga, ona o le natura o mea, e tiga a ona iloa e pulega o se pisinisi o loo faatino e le malo, ua lē fetaui ona toatele fua tagata, ae hire a tagata.
O lea la sa ou faamanatu foi ina ua lagā mai le mataupu lenei, ia le tatou Polenisia foi a o lei faia le tuufaatasiga ma le PolyBlue, na lata i le 500 tagata sa faafaigaluega i le Polenisia, ae tasi le vaalele o le 737, Boeing 737.
E latalata i le 500 tagata, na o le gau gau gau. Fai loa le tuufaatasiga, e lei toe gau le PolyBlue, aemaise o le sau o le taitai o le PolyBlue fai lana lauga ma fai mai, ‘o le matou kamupani i Niu Sila, na o le lua vaalele o le B 737, ae na o le 17 le matou aufaigaluega. 17 ae lua vaa tetele, ae 500 le aufaigaluega a le Polenisia ae na o le tasi le vaa tele.
Ua e maua mai la le telē vale. O le ā la le mea a fai atu, o le tulaga lava ia, o la ua fai e le kamupani a le SamoaTel le mea e tatau ona iai tagata.
Lona uiga o nei tagata ua leva ona lē tatau ona faigaluega ae faafaigaluega a e pulega i le taimi sa iai i lalo o le Malo.
E leai la se mea e toe mafai atu e le Malo, e faapena i soo se galuega. A ta‘u mai a ua lē moomia, ia ua lē moomia, ua uma.
Radio Samoa: O le isi ta mataupu ma le agaga faaaloalo, e tele nisi o le atunuu na faaseā foi ia i latou sa faapena ona taimatalii foi i tulaga maululuga o le Matagaluega o le Eletise. Ua iai le faaupuga faapea ua faaalatua ona totogi a latou paoa.
Ia ae manatua o nisi o kamupani e ova i le ta‘i sefulu tausaga e lei uma ona totogi a latou paoa, a o nai tagata vaivai o le atunuu, e tulitulu aupū, a leai, ua tipi a latou paoa.
O le ā se tulaga o iai sou finagalo i lea itu, lau afioga i le Palemia?
Palemia: O mataupu a na, e manatua foi e le pulega, o lea sa iai le faamoemoe e faatalanoaina, o le ala foi lena o lea e faamalolo ai lē tumau se‘i fai suesuega. O lea la ua iai suesuega, o lea foi la ua iai lipoti, e tatau ona fai i ai se iuga a le Kapeneta i se taimi e lē o mamao.
Radio Samoa: Talitonu i lau afioga i le Palemia, e mitamita foi le agaga o lea ua māua foi se tasi foi o kamupani vaalele mai Saina.
O le a faapena foi ona tuusa‘o mai Saina agai i Samoa pe afai ua faamautuina lea faamoemoe, ia faapena foi ona faamanuiaina ai foi tagata Saina mai Saina agai ia tatou i Samoa, ia aemaise o le autū lava o lenei vaa tuusa‘o pe a faataunuu le faamoemoe, mo le auina atu o le tatou nonu mo le maketi i Saina. Ia po ua faamautuina lea faamoemoe, ma le agaga faaaloalo?
Palemia: Ia seiloga a foi ua faamautu faato‘ā faasalalau e le Malo. Ae o le tulaga a ia e tele a na o aikia e faaalia i le taimi lenei, ae seiloga a foi ua faama‘ape ma felelei ona faato‘ā faasalalau aloaia lea e le Malo. Ae lē faapea o se mea ua ma‘oti. Ae o le tulaga la lena o lea ua matau atu, ua mae‘a mai au fesili, ia e lē uma ai le faiaso a le Atua. Atonu e oo foi i lea vaiaso tatou toe fepaia‘i i le alofa o le Atua, ae faafetai tele i le valaau mai lenei afiafi. Ae atonu o lea o le a agai atu i le faagasologa o le pa‘ū ma nofo, ia pei o le mea lena o lea e gauai uma atu i ai mafaufauga, ona o le fesootaiga foi lea, o lea ua faigofie ona matou matamata atu iinei. Ae o le a faaiu ia le ta talanoaga i lenei po. Faamanuia tele le Atua i le faafogafoga foi a le tatou atunuu i lenei po i le ta talanoaga, Soifua ma ia manuia.
