Ua toe laga foi i luma o le Faamasinoga Maualuga le leaga o le inu ‘ava ina ua faasala i le vaiaso lenei se alii o Maagao ma Faatoia i le fasioti tagata paivalea – o se faalavelave na maliu ai se isi alii o Nuuasoa Tuigamala o Maagao ma Satalo i Falealili.
Faaalia e le alii Faamasino o le Faamasinoga Maualuga, Afioga Vui Clarence Nelson, o lea foi ua toe lagalaga mai le aafiaga o le ‘ava poo le pia i solitulafono ogaoga faapenei. O le popolega o le Faamasinoga, ona o le aafiaga o le tupulaga talavou. O le unai a le Afioga i le alii Faamasino ina ia taofi i le lumanai le soona faasalalau o le ‘ava malosi i luga o televise e pei foi ona vaaia i isi atunuu e pei o Niu Sila. Na faaalia foi e le Alii Faamasino, e moomia i le taimi lenei, o le leai o ni tulafono e faamalosia ai lea tulaga, ona tulai mai taitai o afioaga, alii ma faipule, ina ia faasā i totonu o nuu inugapia e potopoto ai le toatele. E tatau ona mamalu sā e taofia ai le inu ‘ava i totonu o afioaga.
O le isi mafuaaga lea o le tulai mai o vevesi i ia inugapia ona o le toatele ma faigofie ai lava ona tulai mai ai feeseeseaiga i lea itu. I totonu o le lua vaiaso, ua lua ai vevesi ua tulai ma maliu ai le tagata ua iloiloina ma folasia i luma o le Faamasinoga Maualuga.
O le mataupu lenei ua sala ai mo le lua ma le ‘afa vaiaso le alii o John Aukuso o Maagao ma Faatoia ona o le faamaonia o le moliaga o lona faaoolima lea ia NuuasoaTuigamala, o lona lava tei talu ai lava inugapia.
O lē ua maliu ua loa aso o nonofo faatasi ma lē ua molia i lo latou aiga i Maagao a o lei tulai mai lea mataupu i le tausaga e 2009. E faapea se faamatalaga, o le mae‘a ai o le latou galuega mo le toe fausiaina o se latou fale i Maagao, na faia ai se inuga ma agai ai loa i se vaega o le vaitafe o Vaisigano e faauma ai le latou ‘ava malosi.
I le lipoti a le Ofisa Faanofovaavaaia, o loo ta‘ua ai a o fai le inuga ‘ava na otegia e lē ua molia lē ua aafia e tusa ai ma ana amioga lē talafeagai a o nonofo faatasi. O le otegiaga lea na mafua ai le tulai mai o le mataupu, ma o se otegiaga a lē ua molia i lona tei laititi lea ua maliu.
Na mae‘a lea fagu malosi ma o ese mai ma le vaitafe ae agai i se faleoloa e faatau ai se isi fagu malosi e faaauau ai le inuga. O le faaauau lea o le taumafai e saili se isi ‘ava malosi na toe tulai mai ai loa se isi feeseeseaiga ma iu ai ina pailima.
O le faamatalaga a Leoleo, na tu‘i e lē ua sala lona tei lea ma pa‘ū ai tau le ulu i le auala ma na ave i le falemai ma maliu mulimuli ane ai i le mae‘a o aso e lua o taofia ai i Motootua. I le lipoti a le Falemai, e mafua le maliu o lea alii ona o le tele o le palapala alu i lona faiai mafua mai i ni ta‘eta‘ei i se vaega o le ipu o lona ulu.
I le manatu o le Faamasinoga, e foliga mai ai, o lea o loo aafia foi le ‘ava malosi i lea mataupu. O lea ua faasilasila aloaia e le Loia Sili le faia o se tulafono e aiaia ai nei faiga e pei ona tuu atu ai i pulega a alii ma faipule latou te vaavaaia nei tulaga.
Na ioeina e lē ua molia lona moliaga ma na faaalia foi lona agaga salamō e tusa o lana faatinoga ua maliu ai lona tausoga.
Ua mae‘a faalelei ma teuteu totonu o le lotoifale o le aiga ma ua faamaonia mai foi e nisi o matai, sa fesoasoani malosi lē ua molia i le aso o lē ua maliu, o le faatauina o lona pusa maliu, tau o le falemai i togafitiga sa faia faatasi ai ma le lau‘ava. E ui o ia itu uma ae na ta‘ua e le Afioga i le Faamasino e lē avea lea ma itu e lē faia ai se faaiuga faafalepuipui ona e matuia ma ogaoga le soligatulafono ua maliu ai lē ua aafia. E 2 ma le 6 masina ua nofosala ai nei lea alii i le toese i Tafaigata mo le tuliina o lona faasalaga.
