O le vaiaso ua tuanai sa faamanatu ai le Aso Sa o Tamaiti. Manaia lea faatatau mo fanau. Ae ou te lē iloa pe fia ni tamaiti e uma ane lo latou aso faapitoa, ua tau masofasofa i le sasa i le a‘oina o matua ma pese. Ma le tele o tupe e faatau ai ofu mananaia, ae lē iloa atu manu‘anu‘a o le papatua sa faalava ai se fusipau ona o le sauā o mātua. A lē o lea, o le leai o se sootaga mafana ma mātua ona o galuega toe o i le kasino.
O le malaga a Iosefa ma Maria ina ua mae‘a le tausamiga o le Paseka, ae sue ane ua lē iloa poo fea o iai Iesu. Sa pisi solo, masalo na talanoa atu i isi e uiga i le manaia o le sauniga, ua galo ai na vaai poo fea o iai le la tama. Ai ua alu mafaufau i faatauga auā o lea ua tuua Ierusalema ae toe foi, ua lē manatu ai lava ma fesili poo fea o iai Iesu. E atoa le aso e tasi ae faato‘ā manatua.
1. E te silafia moni ea le mea o iai lau fanau?
O le fesili lea e tatau ona fesiligia ai mātua uma. E lē tatau ona fefefe e tali, pe iai ni lagona lē fiafia i lea fesili, auā e tāua tele. Aua ne‘i manatu ua tusitusilima lona faapogai.
Masalo sa iai le manatu o Iosefa ma Maria o Iesu o loo iai faatasi ma latou i le faigamalaga. Ai na manatu o loo filo lava i le solo ma nisi o aiga poo ē masani. Peitai, e lei iai Iesu i le malaga.
Ua faigata nei taimi, ua tele ina tuufau fanau e aunoa ma ni papuipui e siomia ai lo latou saolotoga. Ua iai le manatu ua atamamai latou e ola e aunoa ma se pulega faamatua e faatonutonu ai. O nisi taimi ua faamoemoe i tuaoi, aiga ma ē masani e vaaia a tatou fanau. Manatua, e iai faafitauli e tulai mai ai.
Ae o le fesili, pe e te silafia moni le mea o iai lau fanau, e faasagatonu le fesili i mea nei: e te silafia a latou uo ma mea o loo latou fai? E te silafia ata o loo matamata ai poo tusi o faitau ai? E te silafia le taimi e omai ai i le fale?
2. E te silafia manaoga o lau fanau?
O le tagata, e iai ona manaoga. A faasolosolo ina matua le tamaitiiti, e suia foi mea e faananau i ai. E suia mea e tosina ma mafaufau i ai. E sui foi ma auala e fesootai atu ai ma latou.
E lē tutusa le faatonuina o le tamaitiiti a o lima tausaga, ma le taimi ua sefululima ai ona tausaga.
O se ulugalii e iai le la tama teine, tele ina upuupu tetele lea ulugalii i le la tama ma lalau le faasosososo.
E tuli foi e alu e fai sona toalua. O le iuga, na faaletonu le mafaufau o lenei tamaitai i se taimi, ona e lei silafia e mātua suiga ua oo i ai ma le auala e tatau ona talanoa ai i si a la tama.
O isi taimi tatou te mumusu e talanoa i fanau i mataupu tau faigauo i le va o le tama ma le teine. E manatu, e lei taitai oo mafaufau o tamaiti i ia mea. Pe manatu foi e laiti. E tele polokalame a aogā ma le TV ua a‘oa‘oina ai e tamaiti le tele o lapisi, e tatau ai i mātua ona mataalia i suiga o le soifuaga ua iai fanau.
3. E te silafia le soifua faaleagaga o lau fanau?
E iai le manatu faapea, ua agasala tagata uma, o lona uiga, tuu pea tamaiti e fai agasala auā e leai se mea e mafai ona fai i ai.
E pei lava ona tosina le tagata i le natura pa‘ū, e faapena foi ona tosina i le Atua, auā o lona faatusa lea e i totonu o le tagata. Ae o le tiute lea o le tamā ma le tina, ia silafia poo fea tonu o iai le soifua faaleagaga o le tamaitiiti. E lē faapea a alu i le lotu, ona manatu lea, o loo sologa lelei mea uma.
Pe manatu foi, o tamaiti e lē ano latou i mea faaleagaga ma lē tāua ia latou faigalotu ma tiutefai o aiga. A tatou taupule faatasi ma latou, ma faasoa i ai tiute, e lagona le faatāuaina o latou i le taupulega o aiga, e oo foi i le galuega a le Atua.
E tolu aso o sue Iesu, e lei manatu Maria ma Iosefa, e maua Iesu i le malumalu. Auā foi na o le sefululua ona tausaga i le taimi lea. Ai sa manatu o tafafao ma nisi tamaiti i lalo o se mati, ae lē iloa, ua amata ona tosina lona loto i mea faaleagaga.
4. E te silafia suiga o lau fanau?
A ola le tamaitiiti i se siosiomaga e iai le faitio, na te aoaoina le fiafia e faasala i isi. A ola le tamaitiiti i se siosiomaga e iai le sauā, na te aoaoina le faamisa.
A ola le tamaitiiti i se siosiomaga e iai le taufaifai, na te aoaoina le ma. A ola le tamaitiiti i se siosiomaga e iai le loto matau‘a, na te aoaoina le ita. A ola le tamaitiiti i se siosiomaga e iai le faamaasiasi, na te aoaoina le toilalo.
A ola le tamaitiiti i se siosiomaga e iai le faalaeiau, na te aoaoina le faamalosi. A ola le tamaitiiti i se siosiomaga e iai le saogalemu, na te aoaoina le filemu.
A ola le tamaitiiti i se siosiomaga e iai le faamaoni, na te aoaoina le mea moni. A ola le tamaitiiti i se siosiomaga e iai le faasoasoa tatau, na te aoaoina le agalelei. A ola le tamaitiiti i se siosiomaga e iai le taliaina o ia, na te aoaoina le alofa.
E tatau ona iloaina le mea o iai a tatou fanau. Soifua.
