Ou te matamata atu lava i taaloga o le ‘quarter finals’ i le po o le Aso Toonai, ua lē tutusa lava le manaia o taaloga ona ua leai se Manu Samoa.
O le tausaga 1987 le uluai sailiga siamupini mo le Ipu a le Lalolagi i le taaloga o le lakapi lea na manumalo ai le All Blacks i le ‘finals’ ma Farani. Na pau ai lava lea o le tausaga na manumalo ai Niu Sila i le Ipu a le Lalolagi seia oo mai i lenei tausaga.
Ua faalua ona manumalo ‘au mai Ausetalia ma Aferika, ae tasi le manumalo a le aulakapi a Egelani. Na o le tausaga 1995, talu ona faavae mai le Ipu a le Lalolagi na oo ai le All Blacks i le ‘final’, ae peitai ane na manumalo ma siamupini ai Aferika.
Ua fai mai nisi ua tatau nei ona manumalo le All Blacks i le Ipu a le Lalolagi 2011. Ou te talitonu afai e manumalo le All Blacks i lenei tausaga, e mafua ona manumalo ona ua toeitiiti lava ‘afa le ‘au o tama Samoa.
Ia te au lava ia, ua pei e lē tāua pe manumalo le All Blacks, ae ua sili atu le tāua lo‘u fia vaai atu o taaalo mai tama Samoa e pei o Luatele Jerome Kaino, Maa Nonu, Mils Muliaina, Keven Mealamu, Victor Vito, Sonny Bill Williams, ma Isaia Toeava.
O le Aso Sa, le aso 23 o Oketopa, e fai ai le taaloga o le ‘finals’, poo le taaloga mulimuli e saili ai le siamupini o le lakapi mo le tausaga 2011. Ia tatou talosia ia, ia saogalemu taaloga a nai tama Samoa ia o loo i le ‘au a le All Blacks. Ia manuia foi latou taumafaiga.
E mae‘a loa taaloga o le ‘finals’ o le Ipu a le Lalolagi, ona amata faitau loa lea o le 34 aso ma faataunuu loa le faigapalota faalauaitele a Niu Sila i le aso 26 o Novema.
E toatele tagata ua faailoa mai e le Ofisa o Faigapalota e lei resitalaina o latou suafa mo faigapalota. Ia manatua lelei e lē mafai ona e palota pe afai e lei resitalaina lou suafa muamua. Ua faailoa mai e le Resitala o Faigapalota e tusa ma le 120,000 i latou i le va o le 18-24 tausaga le matutua e lei resitalaina. Ua faailoa mai foi e 57,000 le aofai o latou i le va o le 25-29 tausaga le matutua e lei resitalaina foi latou suafa.
E mafai ona e ‘text’ lou suafa ma lou tuatusi i le telefoni 3675, poo lou alu e faaaogā le tuatusi o le ‘www.elections.org.nz’, poo le telefoni foi o le 0800 36 76 56, pe e te afio ane foi i soo se falemeli, poo le ofisa o lau faipule, ma resitala ai lou suafa mo le faigapalota.
O le Aso Lulu, le aso 26 o Oketopa o le aso mulimuli lea e tapuni ai le resitala mo le faamauina o lou suafa i le Lola a le Aufaipalota. O lona uiga afai e oo atu i lea aso e lei resitalaina lou suafa, e te lē vaaia lou suafa i le lola a le aufaipalota.
Fai mai se tasi o alii talavou sa fesili atu i ai le aufaigaluega po ua resitala lona suafa mo faigapalota, ae faapea mai lana tala i le aufaigaluega “aisea, e leai lava se tāua o na mea”. Ou te faalogo atu i ai o‘u taliga ua tiga ai lava lo‘u loto.
O‘u fesili atu loa i ai, “O e faigaluega?” Fai mai e leai. Ou toe fesili atu i ai, “O e nofo i sou lava fale, poo se fale a le Housing?” Fai mai le alii o le fale a ona mātua.
Ou toe fesili atu i ai, “O se fale umia saoloto a ou mātua, poo se fale a le Housing?” Ae tali mai o le fale a le Housing. Ou fesili atu loa i ai poo ona iloa suiga ua fai e le Malo e faatatau i fale, ae fai mai le alii e leai. O‘u fai atu loa i ai, e lelei ona alu e saili se isi fale e o i ai ma ona mātua pe afai e musu e palota.
Atonu e lē o silafia e lenei alii le uiga o la‘u faamatalaga, ona ua aliali atu i ai lo‘u lē fiafia. Ae pagā lea, e toatele lava nisi o le tatou Atunuu e lē o silafia le tāua o le palota.
Afai e te lē o faigaluega, o lona uiga o loo e faamoemoe i le Malo mo se tupe e tausi ai oe ma lou aiga. E pule le Malo pe maua lea fesoasoani pe leai. O le taimi nei ua faigata ona maua lea fesoasoani.
Afai foi o e nofo i se fale a le Malo, e pule le Malo pe faaauau lou nofo ai i lea fale. E pule foi le Malo pe fia le tupe e te totogi ina ia e nofo ai.
O le taimi nei ua lē faigofie ona toe maua fale mai le Malo ua taumafai le Malo e unai tagata e saili lava o latou fale. E lē gata i lea ua manao le Malo e atoa loa le 3 tausaga o e nofo i fale a le Malo, ua tatau loa ona o ese e sue se isi fale.
E pule le Malo pe fia le tupe e te totogiina pe afai e te manaomia se fomai. E pule foi le Malo pe fia le tupe e totogi pe a e manaomia se talavai mai le falemai.
O le Malo foi e pule pe fia lau lafoga e totogi. Pe fia le GST e toe faaopoopo i le tau o oloa ma auaunaga a pisinisi o loo fai ai lau faatau.
O le faigamalo e faasoasoaina pe fia tupe e totogi mo le faaaogaina o alo ma fanau laiti mo le lumanai.
Afai ua leai sau galuega, e tatau ona e fesili poo le ā le galuega o fai a le Malo ina ia maua ai ni galuega, auā o se tasi lea o tiute a le Malo a Niu Sila, o le fesoasoani ia maua le tomai faapitoa a tagata o loo fia maua ni galuega, ma ia lelei le totogi e tatau ona totogi ai le aufaigaluega.
O nisi nei o mafuaaga e tatau ai ona faatāua lau palota. Manatua lelei, e mae‘a loa taaloga o le Ipu a le Lalolagi, ona toe faafesagai lava lea o tatou ma le faigata ua iai nei le tausiga o o tatou aiga. E maua le faamāmā avega pe a lelei le faigamalo e tulai mai. E ui e pule le faigamalo i le faasoasoa mai o le faamāmā avega, ae pule oe poo ai le faigamalo e tulai mai.