E lē galo le fale, e manatua pea lona anofale
O le tele o lipoti sa ta‘ua ai le toatele sa molimauina le maligi o loimata ma lagona ootia i le faanoanoa ina ua tuuina i lalo le maota e pei ona ta‘ua. O le mau a nisi, sa feteenai ma se finagalo o le alii Palemia ma le faaiuga a le Kapeneta e lagolago ai le talaina o le maota ona ua tuai ma ua lē toe saogalemu.
Sa manatu nisi, ona o le faigata o manatunatuga ma molimau mumusu mai pea o toeaiina ua fai i lagi le folauga, atoa ai ma nisi o soifua pea, o latou sa fausia ma faavae lea galuega tele, e matuā faagalogata tele. Aemaise ai, ailoga a toe maua foliga moni ma le fausaga o le fale pe afai e toe fausia.
E ui lava ina eseese finagalo, peitai e faamuamua e le malo le saogalemu, ona o le molimau ua tele ina pala, ma ua faaleagaina le tele o totoga ma vaega i totonu ma fafo. Ae pei lava ona ta‘ua muamua, e ui ina o le a mou atu i le vaai, peitai o loo matamata tetele ma olaola pea, faatofalaiga o lona anofale lea sa faufau ma matimati ai lona malo tutoatasi i ona upufai.
O le finagalo o le malo, o le a toe fausia, ma o le a iai nisi o vaega e pei o pou, fau ma isi, o le a toe faafoi ane, i lona fausaga fou ma ona foliga fou o le a toe fausia ai i se taimi o muamua.
O tapenaga a le malo mo le faamanatuina o le 50 tausaga o lona tutoatasi mai faiga faakolone a isi malo, ua avea o se isi mafuaaga o le faanatinati ma le mausali o le fuafuaga e tuuina i lalo le maota.
O le a faalauteleina le Malae i Tiafau agai i le vaega tonu sa tu ai le fale tuai, i le manaoga ia lava lelei se avanoa mo le faagaioia ma le gasologa o polokalame o aso faitaulia o le a matuā tumutumu ai le atunuu ia Iuni o le 2012.
