O le fatuaiga ma le agaalofa i tuaa sinasina poo matua tausi, atonu e ala tutusa ai le talitonuga ma faaaloaloga a le tele o atumotu o le Pasefika.
O le Aso Toonai na mavae atu nei, aso 10 o Mati, na faataunuu ai le faamoemoe sa nofo tatalo i ai le Fono Faufautua mo tagata Samoa i Vitoria, o le faatinoina lea o se tautua i se aso se tasi mo tuaa sinasina o le Pasefika, e molimoli atu ai le agaga faafetai ona o la latou tautua mae‘ae‘a na faatino i o latou taimi, aemaise o la latou fautua faatamalii o faatinoina pea mo aiga ma Ekalesia.
E 67 tuaa matutua na afifio atu mai itu e fa o Melepone, e aofia ai nisi mai Niue ma Maori Niu Sila, ae o le toatele lava o tuaa Samoa.
O fatuga tuai a Malia ma Alapati na tele i ai pesepesega. Na saunia taumafataga o le taeao ma le aoauli mo latou.
Na iai foi sui o le matagaluega o le soifua maloloina na saunoa e faamalamalama le faatāuaina o taumafa, ma le ola fiafia.
Na faaalia e le komiti faafoe, na taunuu le faamoemoe ona o le lagolago a le malo faasetete o Vitoria, ma le City Council a Dandenong e ala i seleni.
Saunoa Papaliitele William Purcell sa faatautaia le aso, o le faaoso sili e foi ma i latou uma sa tautuaina nai tuaa matutua i lea aso, o le agaga faagaeetia ona ua faamalieina finagalo ma loto o nai nei tuaa, ae lē gata i lea o le agamalie o a latou sausaunoaga ma saasaaga faa-Samoa.
Na faaiu le aso i le saunoaga a le taitaifono, afioga a Lemalu Tevaseu Satupa‘i, ae o le tofa a Tupai Iakopo Nanai na fai ma sui o tuaa sinasina e faafetai i le Fono Faufautua mo la latou faaaloalo.
Momoli atu ai foi se faafetai faalēa‘ua‘u a le Apu FM Radio ma le Samoa Times i le Fono Faufautua, mo le faatāuaina o nai tuaa sinasina.