O le vaiaso na tea nei na faauuina ai nisi o alo o le atunuu mai le aoga maualuga a Magele ina ua o latou faataunuuina le aoaoga mo le valu vaiaso e taua o le Boys to Men Mentoring. O le faamoemoe maualuga ina ia aotauina ma sauniuni le fanau ina ia avea o i latou ma taitai lelei mo le lumanai, e le gata i totonu o le aoga, le aiga, le Ekalesia ae faapea foi i le va atu i fafo ma tagata aemaise lona ia lava tuputupu ae, ina ia lava sauni o latou mafaufau pe a fetaiai ma ni faafitauli e pei ona taatele i lenei vaitaimi i Aukilani i Saute.
O le susuga ia Chanel Alataua o loo galue faapitoa mo autalavaou ma Joanna Tevaga o le tamaitai faigaluega i galuega tau soifua manuia o tagata lautele (social worker), na la taua e faapea,”o tamaiti Pasefika e atamamai tele ma tele o latou agavaa eseese ma le talenia, ma o lea na ae ai se tofa i le pule ma faiaoga ina ia amata le aoaoga faapenei i totonu o le aoga mo le valu vaiaso”.
E lei maea lelei le valu vaiaso ae ua maitauina e faiaoga le tele o ni suiga lelei o le fanau e le gata i le tautala, o le amio, ae faapea foi ma le va fealoai ma isi tamaiti aoga faapea ma faiaoga.
O se lagona fiafia tele lea i faiaoga ae le gata i lea o le tali faafetai mai o matua o nei tamaiti i le tele o le fesoasoani ua mauaina e le fanau. O le susuga ia Sosiua Sika o le tama taitai o le aoga (Head Boy), na ia saunoa faalaeiau ma faamalosi i tama faauu, faapea foi le pule lagolago o le aoga, le susuga ia Mohan Patel i lona lagolagoina malosi o le fanau ma na fai meaalofa ai i le fanau e o i le latou togalauapiga (camp) mo le 2 aso..
O i latou nei ua faamanuiina Year 9: Jasper Logopati, Marcell Lavea, Tafulu Faalafi.
Year 10: Tolu Telea, Fonofili Bernard Toomata, Pili Faaaoga, Jamal Mafulu ma Solia Solia.
