Sasao pea le faafitauli o laau faasaina
O le faagasolo ai o polokalame faaauau a le faalapotopotoga o le Faataua le Ola, na maua ai se feiloaiga ma le Faatonu o lea faalapotopotoga, le faletua o Ofeira Salevao, i le tulaga ua oo i ai nei polokalame.
Faaalia e Ofeira, mai afioaga e 30 sa faagasolo i ai le polokalame, ua matauina ai e leai se nuu e le o sao mai i lea faafitauli tau laau faasaina poo mariuana.
Sa fesiligia i latou, ae tali mai o se fesoasoani i le taugata o le soifuaga. Sa fesiligia foi pe le o lipotia lea mataupu i le ofisa o leoleo, ae na faaalia e le Faatonu, o le faanaunauga lea o le faalapotopotoga, a maea faamaumauga ma faamatalaga, ona mulimuli ane lea ave i le malo.
Faalua ona faia se faigaaiga i se teineititi lima tausaga
Ua maea ona soalaupule se tasi o mataupu sa galulue i ai le Faalapotopotoga o le Faataua le Ola. Faaalia e Ofeira, ua maea ona faia se faaiuga a le faamasinoga, ma faasala ai se alii na ia faia se faigaaiga faamalosi ma se teineititi lima tausaga.
Na toe ave e le tina lea lana tama ma tuu i se isi aiga, ma faapea ai foi ona toe tupu mai ai se isi solitulafono, e pei ona tupu muamua, poo le faalua lea ona sauaina i faigaaiga faamalosi. O lea faafitauli ua faaalia mai e le Faatonu, e mafua mai i se ulugalii tetea, ona alu lea o le tina ma ave lana tamateine i se aiga e le o lelei ona puipuia ma vaaia.
Faaalia e Ofeira, o le tele o faafitauli e aliali mai ai mataupu faapea, e mafua mai lava i le tetea o ulugalii, ona alu lea o le tina ma ave lana fanau teine. O ina e tupu mai ai ni faafitauli i se tamaloa o le a la toe nonofo, poo se isi foi o le aiga. O le fautuaga a le Faataua le Ola, afai e manatu le tina o le a toe faia se isi ona toalua, ae o loo iai sana fanau teine, ua fautuaina latou e ao ona tuu lelei lana fanau teine i le latou aiga, poo se nofoaga saogalemu foi.
Ua fautuaina ai foi aiga, ina ia tagai ane i le puipuiga lelei o le fanau mai aafiaga i nei solitulafono faapea, ae mafua lea i le vaaiga o fanau i aiga, tuulafoai atu i aiga ese, poo le tuu i aiga tuaoi ae o atu i ni feau poo ni taaloga foi. O le faatamala i lea itu, o le a aafia ai le fanau i le faia i ai o solitulafono matagā.
O loo faaauau pea polokalame a lenei faalapotopotoga i afioaga taitasi.
