Le tamaloa fia fai amio

Ina ua salalau le tala o le a faaipoipo le alii o Faapiano ma le tamaitai lalelei o Sinafoa, e toatele latou te lei fia taliaina lenei tala, ona faapea o latou manatu, ‘ua maimau Sinafoa i lea alii mimita ma le fia siou.’ O nisi, ‘poo gafea lava o Faapiano ua seetia ai lenei tamaitai lalelei sa tatau ona faaipoipo i se alii e pei o ia le atamai ma le aulelei.’
Ua atili nei lagona tetee o le au fai tofā, ona sa fiafia uma i le taimi na fai ai le faigauo a Sinafoa ma le alii aga faatamalii o Falani, ae ua leiloa lava le mafuaaga ua toe momotu faafuasei ai le loto o Sinafoa ia Falani, ae faamaopo loa le faigauo ma le ‘fia siou’ e pei ona tau ai e fafine o le aulotu si alii o Faapiano.
Ua uma le faaipoipoga, ma ua amata le aiga o Faapiano ma Sinafoa, ma e ui i le mafiafia o faitioga sa faaleo i le amatamaga mai o lenei mafutaga, ae pei lava o le tele o mataupu faapea, e mulimuli ane lava ua toe mou malie ese atu na faitioga, pe a lava papale pea ma inu le asipolō o le onosai.
O le mea moni na oo uma le tele o faitioga i si alii o Faapiano, ma e ui na faanoanoa ai, ae sa ia ioe, e moni lava nei faasea uma, aua o ia o se tama, sa fiafia tele i taaga ma nisi o uiga le manuia o le tupulaga, ae atonu o le fia faiava tele ia Sinafoa, na faafuasei ai ona faia ona suiga tetele, ae agai mai e faasiilima le fatu o le tamaitai afakasi. Na manatu Faapiano, pau lava le auala na te talia ai nei lagona le fiafia o tagata i le la mafutaga, o lona galue malosi e fai lelei le la aiga ma Sinafoa.
Na faamanuiaina le mafutaga i se alo tamaitai ua fanau mai, ma sa amata ona matauina e le au faitau laulu, le suiga tele ia Faapiano, i le toaga e tausi lelei lona aiga. I totonu o le nuu, le ekalesia, ma isi potopotoga masani a le aai, e mataina ai lava lenei aiga, e fai o le lalelei o le ava a Faapiano, ae o se fafine foi e atamai tele i le itu tau galuega faaofisa, lea ua maualuga ai lona tulaga i nisi o galuega, ma maualuga atu ai foi ma le alii o Faapiano.
Ua le iloa lava e tagata poo gafea tonu le taimi na faafuasei ai ona toe solomuli i tua le mafaufau o le alii o Faapiano, ona o lea ua amata nei ona matauina e peiseai ua toe aliali mai uiga ia sa mafua ai ona le ioeina e tagata le tuufaatasia o laua ma si fafine o Sinafoa. Ua manatu nei le au faitau laulu, ‘lona uiga na pau lava le mafuaaga na faia ai e Faapiano suiga faafuasei i lea taimi, o le fia faitoalua ia Sinafoa, ae o lea ua maua loa le fafine ma lona afafine, toe fuli loa e fai le olaga lea e manao moni ai.’
E oo foi i si fafine o Sinafoa, ua fai lava si ona maofa i uiga o lona toalua ia ua aliali nei. Ua pei o aga a le tama e leai se toalua, aua a alu lava e tafao, toetoe a le toe alu ane i le fale, pe tolotolo ane foi ua ao, ae pasese lava i lana galuega. E oo foi i taimi e iai uma lenei aiga i le fale, e pisi solo lava si fafine o Sinafoa i le tapenaina o mea ma tausi si ana tama, ae o le mausa lava o Faapiano, o le faasaga i le TV ma faamaeaea uma ata o alaata eseese.
O nisi o fafine o le nuu ma le ekalesia, e toetoe lava oo a latou tala ia Sinafoa i le faavalevalea ma le sese o lana filifiliga, lea ua misia ai lona toalua lelei sa tatau ona iai, le alii o Falani, ae o lenei ua pologa fua ma tigaina i lea tamaloa le alofa. E mautinoa sa iloa uma lava e Sinafoa faitau mafaufau o fafine, ma e ui e le faaleo atu ni ona lagona, ae i le matau a tagata, e foliga ua toe salamo Sinafoa i lana filifiliga na fai, ae ona o se fafine e ese le uiga tausaafia, e le mafai ai ona ia faaalia lena salamo i luma o tagata.
Ua alualuai pea uiga faalekeakea nei o le tamaloa o Faapiano, ae onosai pea si fafine ma tausi si ana tama. Atonu i le manatu o Sinafoa, poo a lava vaivaiga o lona toalua, ae o uiga lava e iai i tamaloloa uma, o le mea sili o loo vaai atu pea i le tino o lana tane i aso uma a o lei moe i le po.
O nisi taimi e taumafai Sinafoa e faasasasasa atu ana faamatalaga i lona toalua i nisi o mea e le o fetaui i lana vaai, ae o ina e vaai ai e Sinafoa, e tee tele ma le fiafia le tamaloa pe a tau lagalaga atu se mataupu faapea. Ona toe tuu mālie lava lea e le fafine, ma o lona alofa faavalea lea i lana tane, ua malie ai lava e onosai ma aua le soona faamamafa ia te ia uiga faaletonu o le tamaloa.
Ae paga lea, na pei e sunui e se tasi i se pelu maai le fatu o si fafine, ina ua faafuasei ona faatepa o ia i se mea atonu lava sa tau sāua muamua i lana faalogo i tala feaveai, ae o le alofa tele o Sinafoa i lona toalua, na musu ai e talia ma talitonuina na tala. Ua salamo le fafine, sa tatau ona ia amanaia faailoilo lapatai ia sa tau vavala mai, ae na moeiini i ai ona mata. A o lenei la ua matua vaaitino ona mata, ma manino atoatoa i lona mafaufau, e le o faamaoni lana tane i le la tautoga o le faaipoipoga.
Ua tagi lotulotu si fafine, ua leiloa atu lona lalelei i ona foliga mafatia ma le faanoanoa. Ua leai se Sinafoa onosai; ua leai se Sinafoa faapalepale; ua matua oo i le tumuai o le fafine le inoino i lona toalua, i nei mau aso e tele na ia galue ponouai ai e avea o se ava lelei ma le faamaoni i le la mafutaga, a o lenei ua tali mai i le mulilua ma le mauga o pepelo.
Na tago atu le fafine ua tapena uma a la mea ma si ana tama, ona o ese loa lea, ae tuu ai mea uma mo le tamaloa fia aiaiaga o Faapiano. Na foi Sinafoa i lona aiga, ma o le aso lava lea, na sasae atoa ese ai lea laupepa o lona olaga, ae toe suia i se laupepa fou matagofie.