O se tasi lenei o galuega faatino a le Ofisa o Aoga ina ia maua ni mafutaga mafanafana ma le fiafia i totonu o aiga, faaleleia ma siisiii tulaga faaleaoaoga o alo ma fanau i totonu o aoaoga, ina ia maua ni lumanai fiafia ma le manuia.
O loo faapitoa lenei polokalame mo mātua, ma faiaoga o aoga amata ma faiaoga o aoga tulagalua. Peitai e matuā aogā tele mo i latou o loo avea ma taitai o autalavou, ma faiaoga o aoga Aso Sa.
O lenei polokalame sa amataina i Amerika, ma ua 25 nei tausaga talu ona faatinoina. Ua salalau atu i le tele o atunuu o le lalolagi ma ua faamaonia lona aogā mo aiga ma aoga i le tele o suesuega sa faatinoina.
O le polokalame mo mātua
O le autū ina ia maua ni mafutaga fiafia ma ni fesootaiga lelei ma le mafanafana a fanau ma mātua i totonu o aiga. O le faamoemoe o le polokalame ina ia mae‘a le taimi fuafuaina ua iai ni auala talafeagai a mātua e gafataulima ai amioga a le fanau ua manatu o amioga faigata. O le tele o le fanau ua lē solo lelei o latou olaga ona e lē talafeagai auala o loo gafataulima ai a latou amio faaalia.
O nisi o mataupu e aofia i lenei aoaoga:
• E faapefea ona taaalo ma maua ni taimi faapitoa a mātua ma fanau
• Upu faalaeiau ma taui o ni amioga lelei a le fanau
• Fesootaiga fiafia
• Faataatitia ni fua faatatau e mulimulitaia
• Fesoasoani i tamaiti ina ia maua ni auala talafeagai e foia ai ni faaletonu
• Tāua o le amanaia ma le faatāuaina o le isi
• Tāua o le tuu avanoa ma le faalogo ma le toto‘a.
Polokalame mo faiaoga
Ua mautinoa ma faamaonia, o le tele o papupuni, lu‘i ma faafitauli i aoaoga a alo ma fanau, o le lē talafeagai o auala e faaaogāina e faiaoga e faamalieina ai manaoga o le fanau. O lenei lava polokalame ua faamaonia le fesoasoani tele i faiaoga mo le gafataulimaina o faafitauli o le fanau ma faamalieina o latou manaoga. A fiafia le tamaitiiti i lona siosiomaga faaleaoaoga, e fiafia foi e aoaoina. E lē gata i lea, e fiafia e fesootai atu i isi ma maua lagona faagaeetia, ma lagona o le manumalo e fiafia ai e faaauau le aoaoina.
O faaiuga o ni suesuega sa iloiloina lenei polokalame ua faamaonia ai le siisii o le malamalama o faiaoga i auala talafeagai e gafataulima ai amioga a tamaiti ua manatu e lē talafeagai i totonu o aoga. O nei lava suesuega ua matauina ai, o le siisii o le malamalama o faiaoga, o le siisii foi lea o le laasaga o aoaoga a le fanau. Ua lē gata ina ua suia le amio, ua faigofie fesootaiga ma isi, ae ua fiafia e aoaoina.
E tusa ma le 12 – 16 vaiaso e faatinoina ai i le lua itula i le vaiaso le polokalame, ae maua ai lou tusipasi i le faaiuga. A o le vaega sili ona aogā, o le maua lea o se mafutaga fiafia a le aiga auā lava ni lumanai lelei ma le fiafia o fanau.
Mo nisi faamatalaga, faafesootai Glennis Allen i le: 021 0811 8879
Poo le Ohomairangi Trust 263 0798
Pe fesootai i le Mangere Learning Centre: 372 Massey Road, Mangere – Telephone: 275 6161
E maua le fesoasoani pe afai e faaletonu auala i le polokalame, e lē gata foi i lea, e saunia foi se polokalame mo fanau laiti a o auai i le polokalame pe a leai se isi e vaaia.
Faimai Tuimauga
