E tusa ma le 45 afe aofai o tagata na gasolo atu e maimoa lenei faaaliga tele ua aofia ai le mamanuina o togalaau eseese, o le faiga ma le tuufaatasia o ituaiga teu fugalaau eseese mo soo se faamoemoe, aemaise laei, se‘i ma pulou ua faia mai fugalaau eseese i soo se lanu.
O le Ellerslie International Flower Show amatalia mai le aso 6 – 11 Mati faia lea i le Hagley Park, lea sa lē faataunuuina i le tausaga talu ai ona o aafiaga o le mafui‘e.
E toalua alo o le atunuu na filifilia faapitoa mai le Academy Aukilani e auai i le tauvaga, o ni uluai tamafanau Pasefika foi ma o se fiafiaga lea i le pulega ma le komiti o loo faafoeina lenei faaaliga tele e faatasi i le tausaga ona faia.
O le alii talavou John Lafaele (Otara), e aotauina i le School of Floristry Academy NZ Aukilani, o le alo o Faaola Lafaele (Sili Savaii) ma Ula Lafaele (Samata Uta & Vaimoso). E tulaga ese lava le tomai o lenei alo tama o Samoa, ua na o ia foi i le itupa o alii sa tamoe ai le faalagamaea e to‘a 14 le aofai.
Na faaalia e John Lafaele i luga o le faatalanoaga i le polokalama Siufofoga Penina o Samoa ma le sui Samoa Times e faapea, na amata lona naunautaiga e tulituliloa lenei taleni mai ana faiga teu o le latou falesa EFKS i Otara, faasolo ane ai i faaipoipoga lasi a lona auaiga, ua ia manatu ai e tinou ma faaauau lana aoga.
E lua tauvaga sa faatinoina: o le teuteuina lea o lou faleoloa ae faaautu i le theme: Passion for Fashion, na maua e John Lafaele le faailoga o le Bronze medal sa teuina lona faleoloa i siapo ma lanu eseese mai le Pasefika, ma le isi tauvaga o le Young Apprentice of the Year, o lana teu sa mamanu ua faaigoaina o le “Faatoaga i Etena”.
O le tamaitai o Sylvia Thompson, 20 tausaga (Papatoetoe), na soifua mai Samoa i ona matua Jesse ma Ramona Thompson (Motootua ma Tufuiopa), e aulotu i le Ekalesia Holy Cross.
Na faaalia e Sylvia na ia naunau e fai lenei galuega ona e fiafia lona tamā e fai togalaau ma faatoaga fualaau ‘aina, sa ia fesosoani tele e faavasega fua o le faatoaga.
Na teuteuina lona faleoloa i ituaiga design eseese e gaosia mai fugalaau felanulanuai, ma ua ia maua le faailoga o le Silver medal.
E to‘a 14 i latou uma na auai i le tauvaga mai pitonuu uma o Niu Sila, o se lagona faagaeetia i nei alo o le atunuu, ua saili malo i nei faiva alofilima ma agavaa, ua aifilofilo ai ma le toatele mai isi atunuu o le lalolagi.
Na manatu uma le toatele o le aumaimoa aemaise lava papalagi e maua o la tulaga maualuga i le faailoga o le Apprentice of the Year, talu ai e tulaga ese nai a la creation, ae na faaalia e John Lafaele o le a toe alo mai lona vaa i Kalaiesetete i le tausaga fou pe a aulia mo le isi tauvaga.
Na laua faaalia lo la faafetai tele mo a laua sponsors sa lagolagoina ma faatupeina le faamoemoe e malaga mai ai i Kalaiesetete, faapea o la mātua ma aiga, aemaise o le nofo tatalo ma le tapuaiga a nai o la mātua faaleagaga faapea ekalesia. Faamalo fai o le faiva John Lafaele ma Sylvia Thompson!
