Nisi o polokalame a le Saasia i aoga amata i Hawaii

O se faiga pa’aga ua ova ma le 10 tausaga talu ona faavae ona o le naunau lava ia ogatasi le futia ma le umele e ala i le tautua i le gagana Samoa mo alo ma fanau o Samoa o loo nonofo aumau i atunuu i fafo. Ua maua foi le taimi e auai ai sui o le Le Fetuao SLC i fonotele a le SAASIA iinei Niu Sila, ma o le a iai foi se fuafuaga e usuina ai se fono a le SAASIA i Hawaii i se taimi lata mai i le manuia mai le Atua. 

“Le Fetuao Samoan Language Centre is a 501c3 nonprofit, community-based organization in Hawaii that has been serving families for over ten years. LFSLC’s mission is to increase literacy in the Samoan language among Samoan youth in order to build an understanding of the Samoan culture and secure cultural identities”.

Ua lua tausaga talu ona faatinoina lenei polokalame e le Le Fetuao SLC i Hawaii. Na o LE FETUAO SLC o loo faia lenei galuega o le a’oa’oina o le gagana Samoa i Hawaii. Pau foi lea o le Aoga Amata ua sapasapaia e le Ofisa o Aoga i Hawaii ma ua galulue faatasi ma le Department of Education.

E leai lava se isi lala poo se polokalame i Hawaii e pei o le Fetuao. Ua faapea foi ona galulue sootauau ma le polokalame Samoa i le Iunivesitē o Hawaii Manoa i le tele o tausaga. E tolu vaiaso na auai atu ai se sui o le SAASIA e ala mai le Seugagogo Aoga Amata i le EFKS Otahuhu, susuga ia Pereise Penn, e faiaoga i se polokalame ua ta’ua o le Aoga Amata Bilingual Summer Pre-K Booster Camp i Waipahu Elementary School, Waipahu, Hawaii. O le susuga ia Pereise Penn, ua iai lona tikeri (B.Ed) ma o le faiaoga ulu poo le supervisor o le fanau laiti (under 2 yrs old).

O lenei polokalame na faatautaia e le faatonusili ma le ‘founder’ o le Le Fetuao Samoan Language Centre i Hawaii, susuga ia Elisapeta Tuupo-Alaimaleata. O le susuga ia Anamalia Suesue (project coordinator) o se tasi o alo o le atunuu, na fesoasoani malosi i le faatautaia o le polokalame ma le susuga ia Pereise Penn mai le SAASIA. O nisi nei o tamalii sa fesoasoani i le faagasologa atoa o le polokalame: Astastia Solomona, Teacher assistant, Devin Barney, Program Evaluator, James Suster, Waipahu Elementary School Vice Principal, Cheryl Natividad, Julie De Gracia, Shawna Medina, Waipahu Elementary School Kindergarten teacher training team, Fetuao Tuupo & Fepuleai Dr. John Mayer, Samoan Language advisors and mentors maDecy Belmonte, HIDOE consultant.

O le autu o lenei polokalame, ina ia lava tapena alo ma fanau (3 – 5 years old) i agavaa eseese (holistic development) ma e ese mai lava lea polokalame i totonu o Hawaii, ona e faaaogāina ai gagana e lua; gagana Samoa ma le faa-Peretania. E lē gata la ina ia lava saunia le fanau mo le tulaga lua (elementary) ae ia maua’a le gagana ma le aganuu Samoa i o latou olaga. 

E 13 fanau na auai i le polokalame, e tausāvali mai i ni pitonuu mamao le toatele ona e lē gata i le manaia o le polokalame, ae ua faalogo o le faiaoga mai i Niu Sila o le a auai. O nai faamaumauga e ala i le iloiloina o le polokalame, ua iloga le alualu i luma o le gagana faitau, gagana tusitusi (literacy), numera faapea le amio pulea o le fanau. E lē gata i lea, ua faaopoopo le vaogagana (vocabulary) a le fanau i upu Samoa e talafeagai ma o latou tausaga. O loo iai foi ni pine faamau ua atagia ai le aogā tele o lenei polokalame, ma e tatau ona faaauau pea i le lumanai.

O le manatu o le taitaifono aoao o le SAASIA; Afioga ia Salā Pafitimai Dr Faasaulala Tagoilelagi-Leota, e toatele faiaoga e iai le agavaa e faasoa ai metotia i Hawaii e pei ona talosagaina. Ua lava foi le tomai i susuga i faiaoga o Aoga Amata i Niu Sila e faatino ai manaoga mai Hawaii. Ae o le filifiliina o se sui o le SAASIA sa taumafai i se auala e faalauiloa atu ai le tupulaga laiti (youth), o le tautala i gagana e lua (Samoan & English) aemaise le aogā o Aoga Amata iinei, e ala lea i se sui na aoga i se aoga amata ma ola ma fanau iinei i Niu Sila. O le susuga ia Pereise Penn, ua 30 tausaga ma e talafeagai uma i ia aiaiga.

Saunoa le susuga ia Pereise Penn, o se avanoa tāua ma le aogā i lona ola a’oa’oina. E ui e eseese tōmatau (curriculum), ae o lona naunau ia aogā mo le fanau laiti. Faailoa lona agaga fiafia ma le faafetai i le SAASIA mo lea avanoa, aemaise lana aoga o le Seugagogo Aoga Amata mo le faatagaina o ia e malaga mo lea faamoemoe. 

Faafetai tele lava Elisapeta Tuupo-Alaimaleata ma Anamalia Suesue aemaise le tinā malolo manumalo ia Fetuao Tuupo mo le vaaiga o si a matou faiaoga i Hawaii. Faamalo le tau ma e finau mo mea sili mo alo o Samoa i Hawaii. Ia tumau pea le tofā saili i lau susuga Peta faapea lau auvaa. Faamalulu atu pe a fai na iai ni lape o le tautua ae talitonu ua tatou aluluga i le aluga e tasi ai i tatou o lo tatou anavatau tauave mo le lumanai o alo ma fanau o Samoa. Ia faamanuia le Atua i le Le Fetuao Samoan Language Centre ma lana pulega faapea le aufaigaluega, ae ola le SAASIA i le alofa o le Atua.