Susuga Rev Karita ma le faletua ia Binary reupena ma se vaega o le Ekalesia EFKSA faaauauina le faaogaina o meatotino a le latou ekalesia

O le masina o Aperila na faagasolo mai ai le faamasinoga i le va o le ekalesia EFKSA Ipswich, o loo tausia e le susuga ia Rev Kerita ma le faletua ia Binary Reupena faapea le itu tagi lea na faaulutalaina faapea, “Taua Faamate ma isi faasaga i le ekalesia EFKSA Ipswich (Rev Kerita)”.

E lē o toe po se lilo i le atunuu, le faamaamulu ese o le ekalesia Ipswich mai lalo o le faamalu a le ekalesia EFKS, o le mafuaaga lea o le faamavae o nisi o matafale o le ekalesia ona o loo iai pea lo latou faanaunauga e faaauau pea le latou tautua i le EFKS. O i latou nei na faamavae mai le ekalesia e aofia ai ma Taua Faamate e ana le tagi e pei ona suesueina e le faamasinoga. 

O le auga o ‘aute o le tagi, “Taua Faamate ma isi faasaga i le ekalesia EFKSA Ipswich”, ona ua vaeluaina le ekalesia, e sili ona tapuni le lotu, faatau ese meatotino a le lotu EFKSA Ipswich ae vaelua tupe, ona tuuina atu lea i Samoa i le ekalesia EFKS aoao, e pei ona iai le feagaiga.  

Na tālia se tali o le mataupu i totonu e fā masina, lea na tau nofo faatali i ai itu e lua, ae o le vaiaso muamua o Aokuso na fofoga ai loa le iuga o le faamasinoga.

O le iuga autū a le faamasinoga, ua teena ma faalēaogāina le tagi a Faamate Taua ma nisi, e lē gata i lea, ae ua aumai foi le iuga a le faamasinoga e lē toe loteaina le mataupu lenei se’i vagana ai aiaiga faapitoa na tolaualuina a’o faafofoga i ai loia ma itu e lua o le faamasinoga. O aiaiga nei:

1. E iai pea le avanoa e faaaogā ai e le vaega e to’a 19 na tagi, o meatotino nei e aunoa ma se totogi pe afai latou te fia faaaogāina ia latou tapuaiga.

2. E iai foi le avanoa e toe foi ane ai pe afai e toe iai se faamoemoe e toe foi mai ma galulue i le EFKSA Ipswich.

3. O loo iai foi nisi aiaiga o loo fai ai fetuuna’iga a loia i totonu o le 2 vaiaso e pei o pili a loia, pe faamata e galulue faatasi itu e lua e totogi pili pe totogi lava pili a le itu ia, ae faatoa manino uma i le isi lua vaiaso. 

Na saunoa le susuga i le faafeagaiga ia Rev Kerita faapea le faletua ia Binary Reupena ma ni sui o le ekalesia, o lo latou agaga moni e tausia pea le va lelei, auā na o latou galulue ma faifaimea faatasi, e tumau pea le alofa.

Ua mautinoa lava o loo faatumau pea le faaaogāina e le ekalesia EFKSA Ipswich o a latou meatotino mo sauniga i le malumalu ma mea fai masani a le aulotu i le hall e aunoa ma le faaliusuavaiina o meatotoino pe tapuni foi le lotu e pei ona finauina. Ua 31 tausaga talu ona faavae mai le ekalesia EFKSA Ipswich. 

O le igoa lava lea o loo faaaogāina e oo mai i le taimi nei, pau le eseesega e lē o toe alu ni a latou faigataulaga i Samoa poo toe pulea mai e le ekalesia aoao EFKS i Samoa, ae o lea ua tutoatasi lava latou. Na faafetaia ai le Atua e le susuga i le faafeagaiga ma le faletua faapea le ekalesia EFKSA Ipswich Rev Kerita ma le faletua ia Binary Reupena, ona o se faaiuga ua tumau ai pea le faaaogāina o latou lava meatotino mo la latou auaunaga i le Atua.

E oo foi ia i latou ua tuumuli ese na o latou gapatia uma, peitai o aiaiga ua tuuina mai, o le lagona lava lea e maua ai pea le nofo lelei ma le galulue faatasi. 

O le tele lava o sailiga seleni i le faatupeina o nei galuega tetele, sa pulupululima faatasi tagata uma o le ekalesia. 

O nisi ua sinasina lauao ua tutupu ma soifua a’e le tele o augatupulaga i totonu o lenei ekalesia o latou nei latou te ‘ae’aeina nei manuia ma tapuai saoloto ai i le lumanai.