Masalo a auiliili le anoanoai ma le tele o taaloga o loo tapena i ai faafiafiaga o le taumafanafana i tausaga taitasi, o le Kirikiti le isi taaloga o loo ave i ai le faamuamua i le faaaogāina lea o Malae, ae faapea foi le tulaga o loo taulai i ai Ekalesia foi latou ia latou polokalame, Faapulega ma Matagaluega poo le Faasinoti, poo taamilosaga lava latou o loo puleaina e Mafutaga ma Faalapotopotoga.
O “Le Mau a Pule ma Tumua” e lē fou nei, ae o loo i totonu o taamilosaga o loo faaauauina pea i tausaga taitasi e pei foi la o lenei tausaga, a fua foi la i lenei tausaga o lea ua taualugaina e “Le Mau a Pule ma Tumua” taaloga Kirikiti sa faatinoina i lenei tausaga mai isi taamilosaga.
Talitonuina e le pulega a “Le Mau a Pule ma Tumua” ua tuai taaloga o lenei tausaga ma ua avanoa ai ‘au e tauva atu i isi taamilosaga, ta‘ua e Poni Fonoti o le iai nai suiga mo le tausaga fou, o le a see atu i le vaitaimi o Ianuari i le amataga o le tausaga fou ina ia auai uma ai ‘au sa faamoemoe e tausinio i le tausaga nei ae ona ua fai si tuai ona faataunuuina.
E lima ni ‘au kirikiti malolosi sa tauva i le taamilosaga kirikiti faasamoa moni a Le Mau a Pule ma Tumua, sa faataunuuina lea i le Aso Toonai na se‘i mavae atu nei i le malae o le Aorere Park i Magele.
E ui lava na o le lima ‘au sa tauva, ae sa vaaia lava le taupati atu o le mamalu o le atunuu e tapuaia le alo faiva o tamafanau a o latou alalafaga ma itumalo.
Sa muamua lava ona saunoa le susuga a le toeaina Rev Setefano Leiite mai le ekalesia PIC Glen Innes, i se upu e tomatauina ai le alo atu i faagatama o le aso. Sa maua foi se avanoa e feiloai atu ai i le faauluuluga o le taamilosaga le susuga ia Poni Fonoti, sa ia faatāuaina ai le fia faamautuina o se vaitaimi o le tausaga e faataunuuina ai lenei faamoemoe i le lumanai, ona ua fai si tuai tele o Mati, ona o vaitaimi ua pisi, o le lē mautinoa foi o le tau, ae o vaitaimi foi ia o polokalame a le Pasefika ma aoga.
Sa ia faailoa ai foi se agaga faafetai tele i ‘au sa tausinio i lo latou lagolagoina o le faamoemoe, e ui lava ua lē o toe pale mai nisi o ‘au iloga sa iai i le amataga, ae talosia ia, ia iai ni toa o alalafaga iloga i le kirikiti, e toe faamaopoopoina alo ma fanau auā le lumanai o le taaloga.
Sa iloa i le Aso Toonai le lagolagoina malosi o lenei faamoemoe e nisi o kamupani, aemaise le susuga ia Anthony ma le vaega mai le Digicel sa vaavaalua ma le kamupani lafo tupe o le KlickEx, ae faapea foi le G-Mana Auto Limited, le GM Cars, ma le Raj Lal Real Estate.
E ui lava la i le malolosi o ‘au e lima sa tauva, ae sa faaiu foi i le toe sueina e le Familia ma le Tama o le Malaka o le siamupini o lenei tausaga e pei ona la tausinio ai foi i le tausaga ua mavae.
O le iuga la ina ua lē mae‘a le taaloga ina ua taofia mo le saogalemu ina ua fai si pogisa, ua tutusa ai nei ‘au ia e lua i le siamupini i lenei tausaga, tutusa le Povi Po‘a ma le Maliolio i le tu tolu, ae tu fā ai le Auniusami.
Talosia foi le faamoemoe o le sauni atu o se ‘au e masii atu e tali le valaaulia mai Tutuila i le masina o Oketopa, e fai ma sui o Le Mau a Pule ma Tumua i faagatama i le motu o faafiafiaga.
Matagofie ma lelei atoa fuafuaga mai lava i le sauniga lotu amata, sa saunia e le Toeaina ia Rev Setefano Leiite mai le Ekalesia PIC i Glenn Innes.
Ua nofosauni atu nei foi la mo isi galuega lelei i lea tausaga, atonu o le a toe faaopoopoina ai nisi ‘au mo le taamilosaga ae lē gata i lea e toe faalautele ai avanoa e auai ai foi tamaitai. Ua nofo sauni atu nei i le valaaulia mai Amerika Samoa ma nisi Atunuu mo ni taamilosaga kirikiti ua valaaulia mai ai se ‘au a le taamilosaga e auai atu ai.
