Na faatumulia ai le maota o le afioga ia Tofa ma le aiga sa Tofā i le afioaga o Saipipi i le motu tele i Salafai, i le Aso Tofi, aso 26 o Fepuari, i uo ma aiga aemaise o le afioaga ma malo fegasoloai, tainane le itumalo, ona o le faanofotupu a le afioga ia Tovi Lei‘a Matafeo i le suafa Tofa.
A o lei alo atu le aiga alii i le faataunuuina ma le faapaiaina o le faanofotupu o le suafa Tofa, na muamua alo atu le faletua ia Mile Matafeo ma le nofoaalo na malaga mamao mai Melepone Ausetalia mo le meaalofa a le afioga ia Tofa Akapo le tamā o le aiga ua tuumalo.cO manu papalagi, pusa apa faapea le seleni ma ona teuga eseese mo le paia o le afioaga, ona alofaiva lea o auauna totofi a le Atua i la latou pito laau tauave o le faapaiaina lea o le nofo, sosoo ai ma le ava usu a le afioaga i Saipipi ma faagasolo ai i tulaga masani o faamoemoe tetele faapenei, ona alo lea o le paia i le aiga alii o le faanofotupu mo faaaloaloga auā auauna faauuina a le Atua, aemaise le afioaga pele o si o latou tuaa.
Na mae‘a lea ona alo foi lea o le faletua ma le nofoaalo mo faaaloaloga auā le Sa‘o o le aiga o sa Tofā, le afioga ia Tofa Tuileva, ma faamatafi ai ma le faamoemoe ina ua tau lau i le alofa ma le agalelei o le Atua. Manuia le faanofotupu!
