O le tatalaga o le aso ua faamanatu ai le tāua o tamaitai i le lalolagi na faatautaia ai se mafutaga i le afioaga o Poutasi i Falealili ina ia saga faamanino le tulaga ua iai sauaga i totonu o aiga.
O le autu o lenei aso faavaomalo i lenei tausaga ua vaavaai ai i le taofia o sauaga ua tulai mai pea i totonu o aiga. O se ata na tuufaatasia e le susuga i se alii fai polokalame tau televise ia Galumalemana Steve Percival ma o se fesoasoani a le malo o Kanata na faatupe ai lenei galuega.
O lea polokalame na pue ai saunoaga a le toatele o tamaitai i le atunuu ua oo i nei sauaga, o i latou o loo nafa ma le toatele o tamaitai ua sauaina ma ua taumafai e fesoasoani i ai. O sui o le malo, ofisa o puipuiga ma tusitala, ina ia talanoaina pea le mafuaaga o le taatele o lenei faafitauli i Samoa ae poo le ā lava se fesoasoani e mafai ona faatino ina ia taofia ai le tulai mai pea o lea faafitauli. O le aotelega o nei ata na faalauiloa i Poutasi o le sao o aiga lava ia ma a latou talitonuga ua mafua ai le faailoga tagata i tamaitai. O le tele o aiga e ave le faatāua e pei ona iai le aganuu a Samoa i tamaitai peitai o loo tele lava tamaitai o loo sauaina e lē gata i upu e lafo i ai, o le faaoolima i ai o alii ma le tele o sauaga matagā ua faia ia i latou.
E tele faatalatalanoaga ma e tele foi lava fesoasoani ua iai ae o le tulaga tāua ua ta‘ua e le toatele o le mafai lea ona faailoa e tamaitai le tulaga pagatia ua iai nei, aemaise o le mafai ona faaleo ma lipotia nei sauaga ma faiga lē alofa. Ua tele feagaiga faavaomalo ua sainia e le malo o Samoa ae o loo faamauina e leoleo le faatuputupulaia pea o lenei faafitauli. O le faataitaiga o le tausaga e 2012 o le aofai o sauaga na lipotia mai i totonu o aiga e 761.
O le tausaga na sosoo ai i le 2013 na matuā tele le siitaga i le 1,992 le aofai o mataupu tau i sauaga i aiga na lipotia ai. O le tausaga na tea nei na oo atu i le 3,260 le aofai o sauaga na ripotia ma o se numera ua faaopoopo ai lava le faapopoleina o le toatele.
E iai foi le fesili pe o le tele o faalauiloa ua mafua ai le tele o nei tagi ua iai le lototele i tamaitai e lipotia pe pau lava ua faatuputupulaia pea lenei faafitauli. O le vaiaso atoa na tea nei na agai ai le tele o ofisa o le malo ma faalapotopotoga tuma‘oti ina ia unai auala e puipuia ai tamaitai ma amanaia o latou aiā tatau ma le faamoemoe ia mae‘a le tausaga lenei 2015 ua iai se suiga i le numera o tamaitai ua sauaina i totonu o aiga.
O le taumafaiga foi lea a le susuga Galumalemana ina ia unai pea ata ua ia tuufaatasia auā lona foi sao i le tau taofiofia o nei sauaga faasaga i tamaitai.