Sasao pea le malosi o BJ Leilua

Ua lua nei vaiaso sosoo o sasao pea le mataina o le taalo a le alo o Samoa ia BJ Leilua mo lana au a le Newcastle Knights lea sa toe manumalo foi i le North Queensland i ‘ai e 16-14 e ui e ta le afa o sili le Kaupoe 14-4. E lua sikoa a BJ Leilua na maua i lea taaloga faapea se sikoa a le uigi Fiti saoasaoa ia Akuila Uate.

O loo molimau nisi i luga o le polokalame a le liki (Footy Show) o le tumau pea o le lelei o le taalo a Leilua talu mai le tafafā poo le Four Nations mo Samoa lea o loo vaaia pea i vaiaso taitasi.

O lenei tulaga ua faigata ai foi e alii faiaoga o le autele a Niu Sa Uelese ona aloese ma le taleni a lenei alo o Samoa auā le tauvaga o le State o Origin.

O le susuga ia BJ Leilua e manatua pea i le mataina o lana taalo mo le Toa Samoa lea na sikoa mataina i Whangarei toe faataututu ma le uigi malosi pei se sauai a le Kiwi o Manu Vatuvei.

O le auupega malosi a Leilua o loo vaaia pea i taaloga uma o le malosi e taofi le polo e tusa pe toatele nisi e taupeupe ai ae sao atu lava lana pasi mo lana ‘au.

E lei uma le tauvaga a ‘Atunuu e Fā’ i le 2014 ae ua iai foi nisi o tusitusiga e faasino ia Tim Lafai, Kyle Stanley ma BJ Leilua e uiga i le ono filifilia i le State of Origin 2015.

Ua matauina nei le moni o nei tusitusiga sa taumafai e gau atu ai loto o nei alo o Samoa e tautua mo NSW ma ono sui ai mo Ausetalia.

Ae peitai e manatu nisi o le filifiliga a Daniel Vidot e fulitua mo Kuiniselani i le taaloga a Setete mo le tautuaina o le Toa Samoa ua fai lea ma poutu o le filifiliga a alo o le atunuu.

Ua o latou faamanino mai i le tausaga ua tuanai e lē o se tupe e taaalo ai mo Samoa, ae o le tautua mo le tapuaiga a Samoa.

Le fetu pupula a le Toa Samoa o BJ Leilua