E faitau miliona tagata o le atunuu o Saina ua latou molimauina se tasi o aganuu tāua a Samoa, o le tāina lea o le tatau a le taulealea Samoa ma le malu a le tamaitai.
O se vaega lea o tapenaga a lo tatou atunuu i le faalauiloaina o Samoa i le faaaliga o le Expo i totonu o Shanghai i Saina.
O le uigi saosaoa a le Manu Samoa i tausaga ua mavae le afioga Muliagatele Brian Lima na uluai silasila i ai le fia miliona o tagata a o ta lana sogaimiti i le nofoaga o loo faapitoa mo tapenaga a Samoa ma ua mae‘a lana tatau.
O le vaiaso nei o loo silasila ai foi le miliona o tagata i luga o televise i le taina o le tatau a se tasi o alii lauiloa i le au lakapi a le Manu Samoa o Roger Warren, faapea ai ma le malu a le uluai kapeteni tamaitai o tuuga fautasi le Afioga Vaimasenuu Zita Martel o loo faapea foi ona ta i Saina. Sa taumafai e maua se talanoaga ma i laua a o lei malaga mo lea faamoemoe peitai ua lē maua se avanoa ona o le tele o tuatuagia.
O se tasi o tufuga ta tatau a le atunuu le susuga Pita Suluape o loo nafa ma lea galuega.
I se talanoaga ma se tasi o ofisa sinia o le pulega o tagata tafafao, na ta‘ua ai o se vaega sili lea ona tumutumu i ai tagata i le nofoaga mo Samoa i le faaaliga o le Expo i Saina.
Faaalia e lea ofisa sinia e tusa ma le lima afe tagata na maimoaina le taimi na faatino ai le tāina o le tatau poo le sogaimiti a Muliagatele Brian Lima, ma o le talitonuga e sili atu le numera o tagata maimoa o le a silasila i le taina o le malu a Vaimasenuu Zita ma le tatau a Roger Warren.
O le faaiuga o le vaiaso na tea nei, o le Aso Toonai lea aso muamua o Aukuso 2010, na tatala ai le aso mo Samoa, le Samoa National Day i le Expo ma o le Palemia ma lona faletua o loo auai faapea ma nisi o Minisita ma faauluuluga o matagaluega a le Malo.
Na saunoa le Palemia susuga Tuilaepa L Sailele Malielegaoi a o lei tuua le atunuu o se tasi lea o faaaliga tāua mo Samoa lava ia e faalauiloa ai i le lalolagi ana tu ma aganuu, o ana oloa gaosi ma isi vaega tāua o tu ma aga faasamoa auā e tosina mai ai tagata tafafao.
O le mau a le alii Palemia, e ao ona nofo sauniuni ai le au gaosi oloa taulima, auā e i‘u ina mae‘a le faaaliga ae faaosofia tagata faipisinisi o Saina poo isi foi atunuu e fia faatauina nisi o a tatou mea taulima.
E lelei la le sau o le manao ma ta‘u mai le aofaiga o ato poo paopao ae o loo lava sauni nai lo le aumai o le manao ae lē mafai ona gafatia e se fai pisinisi i Samoa o atinaeina ia ituaiga o oloa.
