Ua api le uli ma ua lalata foi le va-i-vaa i le faamoemoe o le Malo mo le faataunuuina ma le tuufaatasia o lana fuafuaga mo le Super City.
O se tulaga ua tatau ai foi ona silasila toto‘a, ma fili i le tai se tautai e pei o upu masani a le atunuu.
O le filifilia o ni sui o Samoa i totonu o faalagamaea a Niu Sila mo le faamalu o le Super City, e lē o se vaega e manatu māmā, faataetaealuga i ai le tofa mamao ma le faautautaga.
O le naunautaiga o loo iai ina ia manumaloina e sui o Samoa, ni nofoa mo faufautua, aemaise o sui mo tagata lautele i totonu o le pulega a Aukilani lea o le a tuufaatasia i lalo o le faamalu e tasi.
O le tausinioga e lē toe faigofie, auā ua atamamai uma, ua popoto uma foi, ua silafia uma foi gaioiga ma le faatinoina o fuafuaga, ma ona taunuuga i totonu o lenei atunuu.
Ae o le fesili, E faapefea ona manumalo ma taunuu i se taunuuga manuia pe afai o le manaoga lea, ia iai ma ofi atu ni sui o Samoa i totonu o faiga upu faaitumalo a le Super City.
E tasi lava le ki e mafai ai ona tatala ai le faitotoa o le manumalo, o le tutufaatasi, loto gatasi ma loto maualalo.
A manao e malo, e ao ina uia le auala maualalo ma le loto gatasitasi.
Atonu e faapea tonu se finagalo na ae i le afioga i le alii Konesula o le malo o Samoa i Aukilani le susuga ia Faolotoi Reupena Pogi, i lona taumafai ai ina ia maua se tasi i le tofa ma le atuafetalai, ma le faautautaga fetala‘i i le paia ma le mamalu o Samoa, mo le filifilia o ni sui mo le faamoemoe e pei ona agai mai.
O le manaoga o le Konesula, o le manao malo, ma sa ia ta‘ua foi i se feiloaiga i le vaiaso na tea nei e faapea, o lona tofi Konesula e iai le taimi e mae‘a ma sui ai, ona toe foi lea o ia i Samoa e galue faaauau ai.
Peitai e ao ina silasila toto‘a le atunuu i le tāua o galuega mo le pulega a le Super City, aemaise ai o le lumanai ma le nopiai ai o Samoa i Niu Sila.
Ua maua e sailiiliga a le Samoa Times le toatele o tagata taitoatasi, o sui mai faalapotopotoga, sui mai vaega faaupufai o polokiki, faapea sui mai isi foi vaega ua faatulagaina mo le tauva i tofiga ma le faiga palota o le a faia.
E foliga mai e fai si faigata o le galuega o loo taumafai nei e le Konesula, aemaise le Fono Faufautua a Samoa lea ua piiama nei i le sailiga malo a le sui o le malo.
O le popolega ona e iu ina vavaeina ai palota mo sui o Samoa lava latou ia, ona avea lea ma auala o le sao ane ai o sa o isi atunuu mo nei tofiga tāua tele.
O le toatele o i latou ua tapena mo lea faiga palota, o le mautinoa foi lea o le felefele solo o palota a le mamalu o le atunuu, ma iu ane ai ina lē tau lau o le faamoemoe, ma faaletonu ai se sui ma’oti o Samoa e maua.
Na saunoa foi le Konesula ma ia ta‘ua ai, o loo iai pea le avanoa mo le mamalu o sui tauva faatasi ai ma le mamalu o Samoa, e auai ane ai i nisi o fonotaga o loo faagasolo pea, e saili ai se ‘ai o Samoa mo lea lava tausinioga.
E iai le talitonuga o le Samoa Times, e ao ina tuu ese le pulou o loo faaaogāina e soo se sui tauva lava, ae agai ane e lagolago se finagalo o le atunuu e ala i le soofaatasi ma tutufaatasi.
E lē tatau ona agai i ni faiga pati, ma ni faiga vaega faaupufai pe afai o le a saili le tofa ma le faautautaga a Samoa potopoto.
E tasi le fu‘a e tatau ona faatini ai le tausinioga, o le fu‘a a Samoa tutufaatasi.
