O le vaiaso na tea nei lea na auina atu ai le lipoti a le Samoa Times i le sauniga o le nofo a le suafa taupou poo le sa‘otamaitai o le afioaga o Fausaga i Safata, o Sula.
O se sauniga faato‘ā vaaia lea le faatinoga i totonu o le afioaga.
O le vaiaso lenei na oo mai ai nisi i lo tatou ofisa i Apia nei ona o lo latou faaaliga e lē o aloaia ma e lē o amanaia e le afioaga o Fausaga i Safata lenei faafotutupu ona “e lei autasi le afioaga i le faaee ai i le tamaitai o Ofeira o lenei suafa”.
O i latou na oo mai i lo tatou ofisa o Laumatia Limu, Laumatia Fale ma Toleafoa Tautulu. Na o latou faaalia mai foi ua faatea matai o Fausaga na auai i le saofai lea ona o lea na solitu le afioaga ae faaauau lava.
O le tuua o le afioaga o Toeoso Taulauniu lea na tu ai le tootoo o le nuu ma ua faasala e tea ma upufai o le afioaga mo le 50 o tausaga.
O le faaiuga o le vaiaso na oo mai ai Toeoso ua faamautu le faatea o ia ma le afioaga. O lana faaaliga ua oo mai i Apia e ave le mataupu i le tulafono.
“Ou te fia malamalama pe aisea ua faatea ai a‘u ae o lea sa faatino o‘u tiute. O a‘u na faamamalu i le nofo, auā a leai Toeoso e lē aloaia le nofo a Sula.
O aiaiga o le faatinoga o le nofo ia Sula e pei ona molimauina i le tamaitai o Ofeira, o le suafa lenei e āu i ai suli o Laumatia ma suli o Toleafoa i totonu o Fausaga ae o Toeoso ma Alapapa e faamalumalu i soo se nofo e faatino faapea”.
O le taimi muamua lea ua iai se SULA ua faaee e ala i se sauniga o se nofo ma na faamaonia e Toleafoa Tautulu ma Laumatia e toalua lea tulaga. Ae o le manatu o i latou nei, o Toleafoa Tua‘ena lea e ana le nofo lenei ua ia faatupu le vevesi ua tulai mai i le afioaga auā sa tatau ona iai le maliega autasi a Laumatia ma Toleafoa i le faaee ai o le suafa i le tamaitai na faapaia nei lana nofo.
O le mau a le toeaina o Toeoso o le upu a tuaa ua lagomau mai i tiasa, o soo se tasi o suli o Laumatia faapea Toleafoa e fia fai se SULA e tatau ona taumamafa le nuu ma le itumalo ona mafai lea ona faapea ua amanaia le suafa o le Sa‘otamaitai.
“O le isi lea tulaga matautia o lenei mataupu, e faatea a‘u nei i le oo atu e faamamalu le faatinoga o le nofo, ae lē faatea Toleafoa Tua‘ena e ana le nofo,” o se faaaliga lea a Toeoso Taulauniu.
Sa iai uma le itumalo i lea sauniga ae na ta‘ua e le tamā lenei, ana iai foi se Sula na manatu le isi itu lea e tetee e nofo i lenei suafa o ia foi e alu e faamalumalu ai auā e lē o iai se isi o suafa ia Alapapa i le taimi nei o lona uiga e na o ia lava e agai i ai.
Peitai o lea ua teena lana lagolago ma le faamalumaluga na ave i le Sula a lenei itu, ae o lona lagona e leai ma se mafuaaga o le a teena ai fua ae o loo tatala lava le avanoa i faavae o le afioaga ma le aiga e tau i ai le suafa Sula e faatino ai ni a latou foi faafotutupu faapea.
“Na tetee foi le matou nuu i le faaee ai o le suafa o Toleafoa i le papalagi na avatu e Toleafoa Tautulu mo se faaaloaloga faapea, ae na ou alu lava fai le nofo ma faamalumalu i ai ae e lei faatea ai a‘u, a o lea ua faaee le suafa Sa‘otamaitai i se tasi o toto ma aano o le suafa lenei – o se alo foi e faasino ia Vaafusuaga – o le tausoga o Toleafoa ae o lea ua faatea ai a‘u.
O le mea lea ua ou manatu ai lava ua tatau ona ave le mataupu i le tulafono, e faasa‘o mai ai.
Ua tele lava mea ua solifaavae ai i latou ua faia le faaiuga ia te a‘u,” o se talatala lē malie mai lea a le tamā.
Na fesiligia pe aisea na lē tāpā atoa ai se finagalo autasi o Toleafoa aemaise Laumatia ae na ia ta‘ua, poo le a tau logo e ā ua taatia o se lauti na laulelei le mataupu.
“O le lē fia fai SULA lava o latou ia na lē fai ai a o lea foi ua oo mai lenei alo o le aiga ma le afioaga e fia tautua le nuu ma le itumalo, ae o lea foi ua tetee”.
E $50,000 (tala Samoa) le tupe na aumai lava e le tamaitai auā le faatinoga o lana saofai ma o se tupe tele lea pe afai e lē amanaia lenei mataupu ae na ta‘ua e Toeoso, e faaaogā pea le SULA seia mae‘a lelei lava ona faatino le talanoaina ma le iloiloga o lenei mataupu i le Faamasinoga ona faato‘ā toe logo lea o le tamaitai ua faaee i ai le suafa.
“E leai se mafuaaga o le a tau toe sau ai fua le tamaitai mai i Amerika mo lenei mataupu auā o le aogā na o matai o le aiga aemaise le afioaga, ina ia toe talanoaina le mataupu pe ave loa i le tulafono”.
