O le finagalo lea na faaalia e le alii o loo faauluulu i ai le Kamupani ua ta‘ua o atina‘e a le Pasefika i Saute lea e pule ai se alii maumea Amerika o Tupaisina Jesse James.
O se alii lenei ua silia i le tausaga talu ona sainilima lana kamupani ma alii ma faipule o Sasina i le motu tele i Salafai mo le faatuina lea o se atina‘e tele ua aofia ai se faletalimalo, o se uafu mo vaafaila faapea ai se malae ta polo faavaomalo ua fuafua mo le eleele ua faamatuu faalisi mai e le afioaga i lea kamupani.
O le tausaga lava na tea nei na amata ai loa ma le totogi mai o le lisi a lea kamupani mo lea afioaga i le motu tele i Salafai.
O le taimi lenei ua sili atu i le tasi le miliona tala le tupe ua mae‘a ona totogi atu e Tupaisina Jesse James i le afioaga o Sasina i ona aiga uma ua aafia o latou fanua i lenei maliega.
E 600 eka lea ua foai e Sasina mo lenei atina‘e tele ma o le saunoaga a le alii faipule o le itumalo ua aofia ai Sasina, o se atina‘e aogā tele lea ua faataatia mo Sasina ma o le a tele ai ma avanoa o le a maua ai galuega a fanau o le itumalo i lea nofoaga tele.
E lima fetu o le faletalimalo lea o loo tau faatūina i totonu o Sasina ma o le a aofia ai ma vai taele, atoa ai ma le uafu ma le malae ta polo.
O le amataga o le masina na amata ai ona laga le itu lea ua foliga mai ua fai ai nei feutagaiga a le Malo ma le Kamupani a Tupaisina mo se laisene e faatu ai kasino poo masini poka faitupe o loo ua taatele i atunuu e pei o Ausetalia ma Niu Sila.
O le faamatalaga a le alii Palemia ina ua tāpā e tusitala o le atunuu i lea mataupu. Afai ae taunuu lea tulafono e pei ona talanoaina nei i lona faitauga faalua, o le a vaavaai le Malo i ni tulafono e tapu ai le soona avatu o se faatagaga i atina‘e faapenei.
E lē gata i lea o le a vaai foi i le na o le tasi se laisene e mafai ona ave i se faletalimalo i Savaii, tasi foi i Upolu nei.
O tuutuuga e faatautaia ai nei masini na ta‘ua e le Malo o le a matuā mātau lelei lava e puipuiga o faletalimalo ina ia mautinoa e na o papalagi e malaga mai i fafo mo tafaoga e mafai ona ave i ai le faatagaga e taaalo ai, ae o se upu i tagata o lo tatou atunuu o le a matuā faasā lava.
O le finagalo o le faipule o Sasina, Laaulialemalietoa Leuatea Schmidt, e telē le aogā o nei atina‘e e lē gata i kasino ae faapea foi i le atina‘e atoa ua fuafua mo Sasina.
Na faaalia e lenei alii o le a tele galuega a le itumalo aemaise i tupulaga o le a faamanuiaina ai i lea tulaga. Ua lē gata i lea ae ua faapea foi ona saga atina‘e ai le talimalo a Samoa e ala i tagata asiasi mai i le atunuu.
O le faamatalaga a le alii pule o Tupaisina e manino lelei le latou kamupani i tu ma aga faa-Samoa ma e lē o faia lava se tulaga e ono tauvalea ai ma tauleaga ai fua ia tu ma aga.
Na ia faaalia o se tasi lenei o faatosina tele i atunuu e pei o Amerika o nofoaga nei o loo iai masini poka ma o se auala foi lea e mafai ona vaai i ai Samoa ma le pulega o tagata tafafao i le faaopoopoga o lana tupe maua.
