Faleata Knights – 27 Tuamasaga Eagles – 22 – Photo: Samoa Events

Na toe foi Tuamasaga i o latou fanua ma aiga ma le lē fiafia i faaiuga a le laufali na aafia ai ‘ai o le taaloga ma le Knights. Ae toe minute uma le taaloga ae fai loa ma osofaiga a Tuamasaga i le itu agavale o le malae. 

Na’o le tasi le sikoa mo ia ona tutusa lea o le taaloga, na talitonu Tuamasaga e maua e latou ‘ai ia, pe ana sa’o le faaiuga a le laufali. Mai le osofaiga a Tuamasaga na a’a ai le polo e tuli e le uigi ae alu loa i fafo le polo mai le lima mita mai le laina a Faleata. Talitonu Tuamasaga o latou e ona le polo togi i le lineout auā na po i tua e le fulupeki a le Knights, peitai na ave e le laufali le polo ia Faleata. Mai le laina lea, e lei umi ae uma loa ma le taimi o le taaloga. 

Ae e lē na’o le pau lea o le agasala a le laufali ua laue ai Tuamasaga. 

A’o loma le lineout lea ae faasala foi ma Tuamasaga i le offside. Na ta’ua e le faiaoga i le faaiuga o le taaloga na tauaso le laufali i le pue maualuga na fai e le Knights i le taimi lea, ae faasala le offside. 

Na faaalia e le kapeteni ma le faiaoga a Tuamasaga lagona lē fiafia e faasino i le alii laufali ona o ana faaiuga. 

I le faatalanoaina o le alii kapeteni Solomona Fata na ia ta’ua ai o le taimi muamua lea ua manumalo ai le Knights ia latou. Ae sa tatau foi ona manumalo Tuamasaga i le taaloga i le Aso Toonai i le talitonuga a le kapeteni o Solomona Fata. 

“Na aasa le taaloga ona o le naunau o ‘au e lua e manumalo. O lena foi na tapē e le Knights le taaloga. Ae na tele le avanoa e manumalo ai matou ae ua vevesi mafaufau a tama o le tulaga lea na lē tasi ai i isi taimi le matou agai i luma.” 

O le Knights na vave maua ‘ai e 22-0 i le ‘afa muamua. E lei mafai e le Eagles ona tetee le vevesi atu o le Knights, na faato’a maua se toma i le malologa. 

Na faasala foi ma le tagata e tasi a le Eagles i le pepa samasama mo le 10 minute ma atili faaletonu ai taumafaiga a Tuamasaga. 

“O le ‘afa muamua ona na vevesi mai le Knights na vevesi ai foi ma matou ma alu ai lava le tagata ia. O lea na oo ai ‘ai a le Knights e 22-0.” 

“O le malologa na faatonu ai matou e Galu Rudolph Moors le faiaoga e o e tasi le loto ma pue lelei. O le ‘afa muamua na matou tifeni ai, ae o le ‘afa lua na tatala ai le matou taalo ma maua ai matou sikoa e tolu.” 

O le tulaga maoa’e lea, auā na taalo Tuamasaga i le ‘afa lona lua agai atu i le matagi, ae e lei faaaogāina lelei e le Knights lea avanoa ae na faalagolago i le tele o a latou ai, 22-0. Na toeitiiti lava sameme lea faamoemoe ina ua faatutusa e Tuamasaga ‘ai o le taaloga 22-22. 

O le toe maua ai e le Knights o le sikoa auala i le fulupeki na oo ai ‘ai i le 27-22 ma o ai foi ia na malo ai ile taaloga. Peitai na iai pea le taimi ma fosi ai e Tuamasaga le taaloga i minute faaiu. O iina na tutupu ai faaletonu ua fesiligia e le ‘au. 

Toe faaopoopo a le kapeteni, “E lei iloa e matou pe aisea na le faaaogā ai e le laufali le pu’e maualuga ae faasala le offside ae sa tatau ona tuli i tua le tagata a Faleata se manu e maua ai le matou avanoa iina.

E lei iai se faaiuga a le ta fua ma le laufali.” 

O le taofi foi lea a le faiaoga Galu Rudolph Moors, “O le pu’e maualuga sa tatau ona faasala e le laufali, ae e lei oo i le lineout mulimuli.” 

“O le lineout foi lea na tupu i o matou luma le alu i tua o le polo, o lima o le Knights na fafo ai le polo, sa tatau ona aumai ia matou le polo e togi i totonu.” 

E lei auai le faiaoga a le Knights i le talitonuga, fai mai Tauasa Lalomilo Filemoni o le matafaioi lava lea a le laufali e lē aiā i ai latou. 

O le tausaga muamua lenei o Tauasa e faiaoga ai i le Knights ma e lē faitau e ia faia’ina a lana ‘au ia Tuamasaga i tausaga ua tea auā e lei faiaoga ai o ia. 

O isi Taaloga 

O isi taaloga o le Super IX na faia’ina ai le Navigators i le Eels a Vaimauga 20-29. O le faia’ina muamua lea a le Navigators mai Lefaga ma Safata. E ui i lea ae ua see i lalo i le tulaga #4 le ‘au ona o ‘ai maua faatusa i ‘ai pa’u. O manuia o le Eels e tuu sa’o lava i lima o le latou kapeteni Patrick Faapale na faatonuina le taaloga mai le #13. 

O lana taaloga muamua lea o le Super IX i le 2019 mae na vaaia ai foi le suiga o le taalo a le Eels. 

O le Eels na sili ai i le ‘afa o le taaloga 12-3 ona faaali ai lea o metotia a le Navigators i le amataga o le ‘afa lona lua i ‘ai sosoo e 17 na sikoa i le 20  minute. E lei umi ona mae’a seleselega ia a le Navigators ae faaopoopo ma le lua sikoa a le Eels e taualuga ai le taaloga. A’o le Navigators ua tofo i le oona o le faia’ina mo le taimi muamua i lenei tausaga. 

I le taaloga a le Legends ma Southern Tornadoes, o ‘au uma ia e lei iai se manumalo i le 2019, ae o le Atua Legends na ea mai ai 37-24. O le taaloga e tasi na fai i Salafai na toilalo ai le Savaii Warriors i le Chiefs 15-29. Na malolo lelei le Savaii Vikings i le vaiao nei. E na’o le Vikings e lei iai se faia’ina i le 2019. 

Taaloga o le Vaiaso 5 

Vaimauga Eels vs Tuamasaga Eagles (ACP Stadium, Lotopa) 

Aana Chiefs vs Sava’i Vikings (Fasitoo Tai) 

Savaii Warriors vs Southern Tornadoes (Palauli College) 

Navigators vs Faleata Knights (Saanapu)