I le faailogaina o le Tausaga Faavaomalo a le au Tinei Mu a le lalolagi atoa na faamanatu ina ai e le Matagaluega Tinei Mu a Samoa (SFESA) lea aso faapitoa i le tauvaga o le Triathlon. Na auai i le tauvaga Matagaluega a Leoleo, le Ofisa o le Soifua Maloloina (Ministry of Health – MOH) ma le DMO (Disaster Management Office). E to’atasi na tamo’e to’atasi o Mailata Leau na avea ma sui a le VERTS, o le matagaluega lea e fesoasoani i galuega laveai mai faalavelave faafuasei.
E ta’i lua ‘au a SFESA ma le Ofisa o Leoleo, tasi mai le MOH, ma le tasi mai le DMO. O ‘au e lua a le LTA na toe faamaamulu ese ina ua tu’ufaatasia e le Malo Matagaluega o le LTA ma Leoleo i le vaiaso atu i tua. Na iai foi ma ‘au fesoasoani e lua mai le Samoa Triathlon Federation ma le Samoa Events, na talosagaina faapitoa e le Komesina o le SFESA e fesoasoani ile faamatagofieina o le aso faapitoa SFESA
O le mamao o le tuuga e 250 mita le ‘aau, 10 kilomita le tietie uila ma le tamo’e e 5 kilomita. E toatasi le tagata ‘aau ma tietie uila, ae na to’a lua tagata tamomo’e. O tagata faigaluega lava a matagaluega na faatinoina taaloga e iai ma le tama tuai ole Manu Samoa 7’s o Simaika Mikaele na taalo mai le ‘au a le MOH.
O le matagaluega lea o lo’o galue ai Simaika, o ia na ‘aau i le ‘au a le MOH. Na ta’ua e Simaika e matua ese lava le taalo i luga o le malae ma le ‘aau i le moana, o se mea fou lea ia te ia.
O le faaiuga o le taaloga na mua ai le ‘au a SFESA Taula Upolu i le taimi tu’ufaatasi e 43 minute 25 sekone, o Police 1, Nafanua na tu lua (43:45) ma SFESA Taxi Savai’i na tu tolu (45:30). E lei taulia taimi a le Samoa Triathlon ma Samoa Events i le tuufaatasiga o taimi o Matagaluega.
O le ‘aau saoasaoa na maua lea e Mailata Leau i le taimi e 5minute, a’o le tietie uila, na saoasaoa ai le tietie a DMO, a’o le tamo’e e maoa’e faiga a le Police 1, e 15 minute mo le 5km.
O le ‘aau na faatino i gataifale o le faletalimalo a le Hotel Millenia, ona soso’o ai lea ma le tietie uila na alu aga’i Matautu ma Vaiala toe foi agai i Mulinu’u. Ae o le tamo’e na agai i le uati ma toe liliu mai ai ma agai atu ile faatausiusiuga o Muinuu.
O lenei faamoemoe a le SFESA e fai i tausaga taitasi. O le tausaga na te’a nei na fai ai na’o le fu’a tamo’e e 12km le mamao. Ae o le tausaga nei na a’e ai se tofa i le matagaluega e faatino le tu’uga o le triathlon, ma o le a faia lava I tausaga taitasi. Sa galulue faatasi ai le faiaoga a le Samoa Triathlon Federation i le a’oina o le ‘aau ma le tietie uila a matagaluega i le tolu vaiaso a’o loma le faamoemoe.
Na lagolagoina le faamoemoe e le Taula, na tufa ai faailoga o le manumalo e $400.00 faasolo ai i lalo.
