E lei maua lava le mafuaaga tonu na faaumatia ai i le afi le nofoaga tutotonu o le ekalesia Asofitu Tutoatasi Samoa lea ua tolu vaiaso talu ona tupu lea faalavelave.
Na amata suesuega o laumanuia le faaasu namu e faapea o le mafuaaga lea o le mu, peitai ua faaalia e le komesina lagolago o le pulega o le fuimu ma galuega laveai i taimi o faalavelave, le susuga Faafouina Mupo, ua agai nei suesuega i le fesiligia o ni tagata o le ekalesia sa iai i le fale i le taimi o le mu. O i latou ia sa faaaogāina ogaumu e gasese ai taumafa o se faleaiga e faatau ai lava i le nofoaga ma sa soka ai foi se bbq.
“O se faletua o se tasi o faifeau o loo faatalitali e fia faatalanoa ona o latou ia sa iai i le fale i le taimi o le faalavelave”.
O faamatalaga na tuuina atu muamua na ta‘ua e Faafouina ua fai si eseesega ma faamatalaga ua toe tuuina atu, ma o le mafuaaga lea e lē o talitonuina ai ni mau i le taimi na mu ai le nofoaga e faapea o se faaasu namu na mafua ai.
O tala o le faaasu namu e faapea na mu ai le tainamu sa momoe ai ni tamaiti o se fanau a se ulugalii sa iai i le nofoaga. O le tainamu na aafia i le afi ma faasolo atu ai loa i isi vaega o le fale. Peitai o loo faaalia e le komesina lagolago o le fuimu, o le vaega o loo talitonu na amata ai le mu e lē o autafa o le fale ae o totonu.
Inisiua
Tasi lea vaega o loo faatali nei i ai le fuimu o faamatalaga uma o fogafalelua e lua o le ekalesia ua aafia i le mu ona o le inisiua. O le taitai aoao o le ekalesia e faamautu i fafo o loo faatali i ai pepa o le inisiua, ae na faaalia e le komesina lagolago e foliga mai ia latou sailiiliga, e lē o lelei ona totogi le inisiua, le isi itu faigata i tapenaga a le ekalesia i le mu atoa o fale e lua, ma aafia atu ai ma isi meatotino aoga a le ekalesia.
E pei ona silafia e $5 miliona na faatau ai e le Ekalesia Asofitu Tutoatasi Samoa le fanua ma fale ma avea ai lea vaega o le taulaga i Apia ma o latou nofoaga autū. O le taimi nei e lei talaina ese vaega o fale na aafia i le mu, ona o loo faia pea suesuega i le mafuaaga. Na faaalia e se sui o le ekalesia, o mea ua latou faalogo i ai i le mafuaaga o le faalavelave, atoa ai ma le inisiua, e leai se isi o latou e malamalama i ai seia vaganā taitai o le ekalesia.
