E 12 aiga o le afioaga o Magiagi lea sa iai le maliega i le amataga o lenei vaiaso o le a faatautaia ai le amataga o le galuega a le Malosiaga tau Eletise le EPC mo le faapipii ai o le mita o le eletise totogi muamua, le cash power.
O le taimi muamua lenei ua tino mai ai se laasaga fou i ia feutagaiga talu le feeseeseaiga i le va o le Malo ma le nuu.
O le masina o Aokuso lea sa iai le finagalo o le Malo sa tatau ona amata ola ai fale uma o le afioaga i le eletise lea ua totogi muamua, peitai o le lē maua o se tasi i le va o itu e lua lea na faatū ai loa se komiti e aofia ai sui o le malo ma sui o Magiagi ina ia mafai ona saili se auala e faatino ai loa lea auala o le totogia o le eletise.
O le maliega i le uluai feiloaiga a le afioaga ma le Malo, ua ioe Magiagi e ola i le cash power, peitai o loo iai se latou manaoga ua tuu atu i le Malo ina ia faama‘oti mai le aitalafu tuai lea ua faapea mai le Malo e tatau ona totogi faatasi i le pili o le cash power e tagata o le nuu. O le aofai o lea aitalafu o le 14 tausaga o le mu fua o le eletise a Magiagi na faalauiloa e le Malo e $20 miliona.
O le vaevaega la o le totogiga o lea aitalafu i aiga taitasi o le afioaga, lea e oo mai i le taimi lenei o loo tau tuufaatasia lava e le Malosiaga tau Eletise le EPC. E tele faafitauli ua lē mafai ai ona maua mai se faamaoniga o lea lafoga. O lea na taumafai le EPC e toe agai i le afioaga ina ia toe faitau mai le faitauga ua iai mita tuai o le eletise.
Na mae‘a lea galuega na faatautaia i le masina na tea nei, ae o lea ua maua ai foi e iai nisi o fale fou ua fausia i totonu o le afioaga, e lei iai ni mita e pei ona sa iai mita tuai. O le mafuaaga na ta‘ua e nisi o le nuu ona e agai atu e fai mita o fale fou nei, ae faapea ane le Malosiaga e le o toe iai ni mita tuai auā o lea ua faagasolo le mita totogi muamua le cash power.
O le toatele la o aiga nei na toe agai ese loa ae ua maua e le EPC ua ta‘i sa‘o mai lava le malosiaga tau eletise i laina eletise ua i totonu o le afioaga ma ola ai maota fou nei. O le saogalemu la le tulaga ua faapopoleina ai le Faalapotopotoga, faaopoopo i ai ma le tulaga lenei, e le mafai ona ola faapea ni fesootaiga tau eletise auā ua lē mafai ai loa ona faamau iunite ma le tele o le malosiaga ua faaaogāina e nei aiga.
O se faiga e lē talia e le tulafono ma ua tuu atu nei aiga nei e 12 e tatau lava ona faaola loa mita cash power. A leai o le mau a le Faalapotopotoga o le EPC, e tatau ona faasala faaletulafono ma o le sala tupe e lē sili atu i le $5000 (tala). O le isi laasaga pe a lē malilie aiga e ana maota fou nei, o le motusia atoa loa o le malosiaga tau eletise ma e lē toe faatagaina ona ola se eletise i ia maota.
Na feiloai le afioaga ma faamatala e sui o le afioaga i le komiti lenei lea tulaga e faamanino i aiga nei le manaoga e amata loa ia i latou le faaola o le mita cash power, a o tālia e le tele o isi aiga o loo iai lava mita tuai se faamaninoga o aitalafu ua manatu le malo e tatau ona totogi faatasi ma le amataga o le cash power.
O loo tumau le tetee o nisi o sui o le afioaga peitai o le toatele o aiga ia e iai le faafitauli lea o le leai o ni mita, ua malilie e amata loa le mita fou lenei i o latou fale ma e lua lava aso o le vaiaso lenei sa faatautaia ai lea galuega a le EPC. O loo faatali pea la le faataatiaga o aitalafu e pei ona iai feutagaiga.
O le mau a le afioaga ua tuu atu i le komiti lenei, afai e le o mafai ona faataatitia lelei mai le aitalafu a lea aiga ma lea aiga, e faigata ona malilie aiga e totogi se aitalafu e lē o manino le faataatiaga.
Ua iai le manaoga o le nuu ina ia faamagalo le aitalafu auā e lē tatau ona talia ni faamaumauga e lē o faamaonia. E ese mai i finauga o loo faaauau i le faamagaloga o le aitalafu a le afioaga, o loo ese lava foi talanoaga ua unai nei i taui e ave e le Malo i fanua ua faaaogā i ana atinae ae o le taimi lenei na ta‘ua e le afioaga, se‘i mae‘a lelei lava feutagaiga i le aitalafu a le nuu ona faato‘ā mafai lea ona toe laa i ni taui e agai i le faaaogā ai o le tele o fanua o Magiagi mo atinae a le Malo.
O loo tālia pea se lipoti a le EPC e faatatau i le aitalafu lenei aemaise o se numera maumaututu pe fia tonu lava le tupe ua manao le EPC e totogi atu e le afioaga pe a amata loa ona totogi le cash power a tagata uma. Ae mo aiga e 12 ia ua faamautu le leai o ni mita, o i latou la ia ua faatutū a latou cash power i lenei vaiaso ma ua amata ai loa lea laasaga ua faitau masina o faatali le Malo e faatautaia.
O iina foi e manatu le EPC o le a mafai ona faatino ai le lipoti lea e tālia pe a vaai i le aotelega o le tupe e tatau ona totogi e aiga ia i aso taitasi auā sa lē mafai ona faamauina talu ona amata mai le ola e aunoa ma se mita eletise.