“Ia avea o outou ma ni tagatanuu lelei, usiusitai ma faamaoni”…Palemia
E toafa tagatanuu o Niu Sila, toalua Ausetalia, toalua mai Amerika, toafa mai Saina, toatasi le Fiti le Initia, totasi foi le Toga ma le Tuvalu ua maua o latou tagatanuu poo le sitiseni Samoa.
O o latou foliga fiafia ua lava lea e ta’u mai ai o lagona suamalie ma le mimita ua maua le sitiseni Samoa ua faigofie ai ona nonofomau i le atunuu ma agavaa i soo se auaunaga e aunoa ma le tau fesiligia soo poo ua nofomau ae poo ua maua se tagatanuu.
E tutusa lelei lagona oi latou ua maua le sitiseni Samoa ma lagona foi oo tatou tagata pe a maua le sitiseni Niu Sila poo le Sitiseni Ausetalia ma isi atunuu i fafo. O se vaega o le toasefuluono ua maea ona faatauto ma maua le sitiseni Samoa ua faaipoipo ini tagatanuu moni o Samoa ao nisi sa aumai ma nonofo i Samoa mo le tele o tausaga. Na saunoa le Palemia susuga Tuila’epa L Sailele Malielegaoi ma ia faafetaia i latou i le latou tautua lelei i le Malo ma le atunuu atoa, ae sa taotaotua ai upu apoapoa’i ia tautuana e avea oni tagatanuu lelei o Samoa e usiusitai ma faamaoni ma tausisia tulafono a le Malo.
O se tasi o tagatanuu o Niu Sila sa avea ma Haikomesina o lea Malo i Samoa le susuga David Nicholson e mau paolo ise tamaitai Samoa ua maua lona sitiseni. E faapena foi le tamaitai o Moneka Knight sa faiaoga i le Iunivesite aoao o Samoa i le matata o le tusitala ma faasalalau ua maua foi lona sitiseni ona e mau paolo ise alii Samoa e toalua o la alo.
O le susuga Polofesa Mohammed Umar o se Fiti sa faiaoga i le Lala o le Iunivesite a le Pasefika i Alafua e mau paolo foi ise tamaitai Samoa ua maua lona sitiseni, faapea le alii Initia o Mahendra Mahik e mau paolo foi ise tamaitai Samoa ua maua lona tagatanuu Samoa.
O tagatanuu o Saina e toafa ua maua sitiseni Samoa oni faipisinisi ma ua tele ni tausaga ua aumau ma nonofo i le atunuu.
