Ua leai se leo o faalogoina o faifeau o le EFKS o loo tausi nuu i Samoa ina ua amata ona faaaogā e le matagaluega o tupe maua a le Malo aulape o le tulafono o lafoga totogi, o le aveese lea o ni seleni mai teugatupe a Faifeau EFKS e tusa ma le 270 e lei totogia ni lafoga talu mai ona amata faamamalu suiga fou o le tulafono ua tatau ai ona totogi lafoga a Faifeau o loo maua faamanuiaga tau tupe mai alofa poo peleti. “O le Malo lava ia e faataunuu mea uma e talafeagai e manuia ai tagata lautele, ma o lea sa tuu avanoa le Malo i le ono masina na toe taatia atu e faatumu mai ai pepa e fua iai a latou lafoga e totogi ae e lei faatinoina lava”.
O le finagalo lea o Tialavea ina ua maua se avanoa e faatalanoa ai e tusa o le gaioiga a le vaega o lafoga ua aveesea ai seleni mai teugatupe a faifeau o loo i faletupe eseese i le atunuu. “E lē mafai ona nofonofo le Malo ae faatino le mea e tatau ona fai auā e tatau ona fair i isi faifeau o isi ekalesia lea ua totogi mai a latou lafoga”, na saunoa ai lava le Minisita o Tupe Maua. Ua faaalia foi e Tialavea pe ana usitaia e faifeau EFKS le aiaiga o le tulafono ua pasia e le Palemene semanu o faifeau ei lalo ifo o le 15 afe tala lona alofa e maua i le tausaga e lē lavea i le gaioiga ua faia nei o le aveese mai o seleni mai a latou teugatupe.
E tusa ma le lima afe tala le seleni e tatau ona totogi e le faifeau EFKS mo le ono masina na tuu avanoa iai. O lona uiga o le aofaiga lea o le tupe o a latou lafoga ua fuafua e le vaega o tupe maua e tatau ona totogi.
“O se fua lena ua mafai ona taunuu iai le pulega o le matagaluega i le aofaiga o le lafoga e tatau ona totogi mai i le ono masina muamua o le tausaga nei”. Pe afai e oo atu i le faaiuga o le tausaga nei e lei faatumuina lava e faifeau pepa e iloa ai le aofaiga o lona alofa e maua i le masina ona fua lea o lana lafoga e totogi, ua faaalia e Tialavea o le a oo loa aulape o le tulafono i le ave faamalosi o aseta a faifeau e pei o taavale. “O le taunuuga lena o aulape o le tulafono ae mulia’i ona oo i le faamasinoga pe a fai ni moliaga”, na faaalia ai e le minisita o tupe maua, ua toe lava o le Ekalesia Faapotopotoga Kerisiano Samoa poo le EFKS e lei totogia ni lafoga a faifeau tausinuu seia vagana ni faifeau e silia i le toasefulu.
“O loo iai lava nai faifeau o le ekalesia o loo lagolagoina le Malo ma suiga o le tulafono, ae ou te masalo ona o lea e toe faatalanoa e le fonotele a le ekalesia le mataupu i le latou fono o le tausaga fou, o le mafuaaga lena o le lē usitai o le toatele o faafeagaiga o le ekalesia”.
