Ua sulu le faalapotopotoga o le Samoa Solidarity International Group poo le SSIG i le ofisa loia o le Sapolu Law Firm e finauina lana tagi o se su ua faaulu i le faamasinoga maualuga faasaga i le tulafono o le lesitalaina o fanua na pasia e le Palemene i le tausaga e 2008.
Ua agai le su i le lisiina o fanua faaleaganuu ma ua talitonu le SSIG ua afaina ai le vaega 102 ma le 109 o le Faavae o Samoa. O se tasi lenei o mataupu o loo alu ai tala’iga a le SSIG i Samoa ua savalia ai nuu ma afioaga o le atunuu e faamalamalama lea tulafono ma vaega o le faavae ua aafia ai.
E manatu le SSIG e le sa’o le faamalamalamaga a le Malo o loo tali ai i le mataupu i lea tulafono o loo faapea mai ai e lē o afaina le vaega 102 o le faavae lea o loo tapu ai ona faatau ese atu fanua faaleaganuu. E pei ona silafia o le 80 pasene o eleele o Samoa o fanua faaleaganuu e pulea e suli ma matai o aiga o le atunuu.
O se mataupu lenei ua mae’a ona tali iai le ta’ita’i o le Malo le afioga i le Palemia susuga Tuila’epa L Sailele Malielegaoi, ma ia saunoa ai e lē mafai ona fai mea tuulafoa’i le Malo i le mamulu ese atu o le pule a suli ma matai o aiga io latou eleele faaleaganuu.
O loo taoto nei i le Palemene se tulafono teuteu o loo manaomia ai e le Malo le lisiina o fanua faaleaganuu i lalo o ni aiaiga, ma o lea tulafono taufaaofi o loo i luma nei o se komiti a le Palemene mo le tuuina atu o finagalo o le atunuu. Ua maua ni molimau e faapea e faatoa oo atu lea tulafono teuteu i luma o le Palemene i le masina o Oketopa, ma o le a toe soalaupule ai ma faia ai se faaiuga.
O le tamaitai loia Samoa mai Niu Sila o Josephine Fuimaono Sapolu, e pei ona faailoa mai i se pepa o faasalalauga lautele a le SSIG o le a finauina le mataupu i luma o le faamasinoga maualuga i Mulinuu. O lea tamaitai loia o se alo e faasino i le ta’ita’i o le vaega faaupufai o le Faamuamua Samoa le susuga Unasa Iuni Sapolu.
E lei iloa se aso e fofogaina ai le su i luma o le faamasinoga maualuga, ma o se tasi lenei o mataupu o loo tulituliloa pea e le Samoa Times, se aso e valaau ai molimau mo le lipotia auā le silafia o le atunuu.
O le SSIG o se faalapotopotoga o tagata Samoa o loo iai ona lala i Ausetalia, Amerika, Hawaii ma Niu Sila ma sa auai o latou sui i le savali faaaloalo o le Tutoatasi na faia i le masina o Iuni o le tausaga nei.
