O le autasiga a suli o Moli, suli o Talavou ma suli o Gatuitasina e faaee le suafa Malietoa i le aloalii le afioga ia Faamausili Moli, e pei ona faamamaluina e le faaiuga a le Faamasinoga o Fanua ma Suafa i le masina o Tesema 2017. O le mafuaaga lea o le tapisa o le Vaopipi ina ua faafotutupu le Malietoa.
Peitai, o se faamoemoe o loo faamalumalu iai mataupu tau faamasinoga o loo lamatia ai le faaauauina o le nofo. E pei ona o taoto ai nei le talosaga apili a nisi lava o suli o Moli faasaga i le iuga a le Faamasinoga o Fanua ma Suafa 2017. E le gata i lea e lei mafai foi ona faaee Papa o le Gatoaitele ma le Vaetamasoalii, ona o se poloaiga a le faamasinoga, na taofia ai le faaeeina o Papa i le Nofo.
E le gata i lea ua taulimaina foi e le Samoa Times se kopi o le talosaga a alii ma faipule o Afega na tuuina atu i le Susuga ia Papalii Faamausili Moli, e tauala atu i le Ofisa o Faamasinoga o Fanua ma Suafa e taofia ai le faaeeina o le suafa Malietoa ia Faamausili Moli, o nisi o mafuaaga na ta’ua i lea tusi ua alagatatau ai ona taofia le faataunuuina o le nofo e aofia ai:
•O le faatinoina o le faafotutupu e lē o tusa ai ma Tu ma Aga mamalu a le fale Tuamasaga
• Ua olegia e Moli Malietoa, Fata ma Maulolo, faapea suli o Gatuitasina ma suli lava o Moli, o loo solitu foi suli o Talavaou
•O le faaaogāina e Moli o le suafa Malietoa, o le a atili ai ona vevesi le lotoifale o suli o le Malietoa ma ta’ufaatauvaaina ai le mamalu o le suafa Malietoa.
O nisi ia o mafuaaga na ta’ua i le tusi o loo sainia e matai o Afega, na auala atu i le Faamasinoga o Fanua ma Suafa, na tuuina atu ia Faamausili Moli, e taofia ai le faataunuuina o le nofo.
Peitai, e lei logosa’ia lea tusi taofi ae na faataunuuina lava le nofo i le taeao o le Aso Faraile 17 o Aokuso. O le aso lava foi lea aso 17 o Aokuso 2017, na tauaaoina ai se tusi o loo sainia e le Resitala o Faamasinoga Tuiloma Lopez Williams, i le Komesina o Leoleo, Fuiavailili Egon Keil, e talosagaina ai le faia o ni moliaga e faasaga ia Papalii Faamausili Moli faapea alii ma faipule o Malie, ona o le lē usitaia o le Poloaiga lē Tumau a le Famaasinoga i le Aso 16 o Aokuso 2017, e taofia ai le Faafotutupu i le suafa Malietoa.
E to’a 12 matai o le afioaga o Malie faatasi ai ma le afioga ia Papalii Faamausili Moli o loo faasaga iai le talosaga ua tauaaoina e le Komesina o Leoleo mo le faauluina o ni moliaga.
E tusia lenei lipoti e lei maua mai se faamatalaga mai le Komesina o Leoleo pe ua faaulu ni moliaga faasaga ia Papalii Moli ma matai o Malie.
O le Faafotutupu na auai atu iai le afioga i le Ao Mamalu o le malo le afioga ia Tuimalealiifano Vaaleto’a Sualauvi II. O vaega ua mautinoa, ua mae’a ona faafotutupu Papalii Faamausili Moli i le suafa Malietoa, peitai, o Papa o le Vaetamasoalii ma le Gato’aitele, e lei faaeeina i le Malietoa.
