O loo i le ofisa o leoleo le tagi a se tamā 53 tausaga le matua na osofai e ni taulelea se toafā o pasese a le tamā e ana le taavale laupasese na malaga ai taulelea nei.
O se faalavelave ua fai ma fautuaga i le au avetaavale i le atunuu ia mataala ma ia taumafai e faalogologo lelei le ituaiga talanoa o loo talanoa atu ai soo se pasese e piki aemaise i le tuneva o le po.
O le afioaga o Vaiusu lea na tupu ai le faalavelave, ma na faamatala e le tamā, na muamua o latou afea se tasi o fale‘aiga i le taulaga ma fai ai le faatau a lana pasese. Na faapea ia ai a nonofo uma le aualii i le fale’aiga peitai, na malaga le isi toalua e fai le faatau, ae faatali atu i le taavale le isi toalua.
“Na lilo i lo’u manatu e iai se mea e tupu, aemaise lea foi ou te vaai e vave mai le toalua lea na o e fai le faatau, ma na uma le la faatau agai mai loa matou o loa i Vaiusu e momoli iai le pasese.”
“O luma i le magatolu i Vaiusu i luma o le fale inisinia o Loto, lea na fai mai ai e tuu ai latou.
Na ou liliu le taavale ma faasaga mai i tai, ona fesili mai loa lea o le isi alii ma fai mai, pe fia le tau o le taxi ona ou fai loa lea iai ua lava se $12 tala o le pasese.”
“Ua oso le isi alii i fafo ma tago laga lana taga, lea la ou te mua ona ou tilotilo atu i le lagaina o le taga a lea alii, ae oso loa i fafo le isi alii ma aapa mai tu’i a’u.
Ua laki la e lei au mai lana tu’i na ona ou tago atu lava faaoso ma le taavale ae oso pei e feliuai ma faasaga agai i tai le afi le afi o le taavale.”
Na saunoa le tamā pau lava le mea sa ia iai le taimi lena o le alu ese, peitai e iai le isi alii o le aualii e toafā, na manatu ua ou lavea i le tu’i, auā na oso mai i totonu o le taavale o le mea na tupu, na toso e le taavale.
“Oso le taavale laa mai le alii lea toe oso i tua o le taavale, pau le mea na tu mai ia te au, ou te lei toe ano iai i le alii lea, ae pau le mea ia sao la’u taavale i te’i ua togi e se isi.”
“O le taimi nei ia te au, ua ou lē toe faasamasamanoa loa la, o lea ua ou iloa le mea e fai, ma le pasese e tatau ona ave ma le pasese e aua le avea.
O le metotia foi la lea o le a ou faia o le faatalanoa lelei o pasese, ma e tatau ona ou faalogologo toto’a i le ituaiga talanoa e tatau ona ota faatalanoa ai pasese.”
O le fautuaga a se tamā 53 tausaga le matua, e tatau i ave taavale uma ona utagia lana faamatalaga ma ia nofo sauni i mea e faaono tupu.
E le o le taimi muamua lenei ua tupu ai ituaiga faalavelave faapea i le atunuu.
Ua matauina foi e le matagaluega o leoleo, ua le asa se masina ma lipoti faapea ua tulai mai ma oo ane ai faamatalaga i le ofisa.
Na tupu foi le isi faalavelave i se alii ave taxi na fasioti ai ma tuu i tua o le keli o lana taxi.
Ae mulimuli ane toe tigaina ai aiga e ifo ma pulolou i ietoga, e pei ona molimauina ai i le pitonuu o Moamoa lena foi faaletonu i le silia ma le lima tausaga talu ai.
Peitai, e ese le itu na faatino ai e le isi ave taxi na alu e ave lana pasese i Laulii i se taimi lava o le tausaga nei.
Na sola le pasese e lei totogia le taxi, na tuliloa atu e le tupulaga ma maua ane ma avane tuu i le keli o le taxi, e momoli i le ofisa o leoleo, ae oo atu i leoleo, e susue atu le keli o le taxi ua maliu ai le pasese.
O le vaiaso foi na tea nei, na fasi ai e ni taulelea se toalua se tamaloa palagi faipisinisi o loo maupaolo i se tamaitai Samoa.
Na uma ona faaoolima iai le toalua lea, ona faataatia lea o si tamaloa i autafa o le faleaiga a le McDonalds ae sosola i le taavale, ma ave faatasi atu ai ma nisi o mea aogā a le tamā, e pei o le laptop ma isi mea totino e manaomia.
Na maua e leoleo le taavale i Vaitele ae ua fiu e sue tagata na sosola atu i le taavale.
Peitai ua faamaonia mai e leoleo i le faaiuga o le vaiaso e toalua ni alii ua molia i le faalavelave, oi laua ua leva ona sue e leoleo, o le isi na sailia i lona tusi saisai, ae o le isi ua leva ona sue e leoleo ona o moliaga o le umia o le laau faasāina o le mariuana.
O loo masalomia foi o nei alii e aiga lelei lava.
Ua taofia nei e leoleo e faatali ai le aso e valaau ai le la mataupu i luma o le faamasinoga.
