O le Aso Tofi o le vaiaso na tea nei na iloiloina ai e le au a tamaitai mai Tonga le malosi o le au a le Fetu Samoa i le taamilosaga o le ipu o le lalolagi i le vaega o tamaitai lea o loo faagasolo nei foi i Ausetalia. O lenei taaloga na faia lea i Stockland Park, Lake Kawana i le setete o Sunshine Coast poo Kuiniselani. E 40 ai na manumalo ai le au a le Fetu Samoa i le leai a Tonga.
O se taaloga na sauno i ai le alii faiaoga i le Fetu Samoa ia Tavita Solomona, ua leva ona tapena mai i ai lana au ona o lana uluai taaloga lea o le taamilosaga o le ipu o le lalolagi. Ui i ia lagona o le susuga i le alii faiaoga, ae lei seetia ai ona lagona i le manumalo o lana au, ona o loo fita pea le ala o loo tauivi atu ai mo le agai atu i le faaiuga o le taamilosaga.
Ua sauni atu nei la le Fetu Samoa i lana taaloga ma le Pacific Nations i le afiafi o le Aso Sa, 9 o Novema ma e lomia la tatou lipoti lenei e lei faatinoina le taaloga lea. Talosia le faamoemoe o le Fetu Samoa ina ia tau i manu ma agiagia ai pea le tagavai a Samoa i lea foi faagatama o loo faatino nei i Ausetalia.
