savalia nei le lua o vaiaso talu ona faia suesuega a leoleo i le gaoia o le $420,000 mai le ofisa o le penisione a le au matutua i le NPF, peitai ua nao le $100 afe ma ona tupu se seleni ua mafai ona toe maua, ae o loo leiloa pea le isi $300,000 ma ona tupu e lei maua. Ua faaalia mai e leoleo o loo faafiti pea le alii o Sione Taateo lea o loo molia i lona faia o le gaoiga, e leai ma se isi tupe o ia te ia, ae na pau lava lea o tupe ua toe faafoi atu, ma se isi tupe na maua o tanu i se vaega o le togavao i Aleisa
O le Aso Gafua, 3 o Novema na tutulai uma ai le alii o Sione Taateo ma Tautai Fata, i le faamasinoga maualuga mo le uluai valaauina o moliaga a leoleo faasaga ia i laua ona o le gaoia o lea tupe tele. Peitai ua toe tolopo i le isi lua vaiaso e toe fofogaina ai ona e lei maea suesuega a leoleo e faamautu ai moliaga. Mo le alii o Sione ua faaalia e loia a leoleo, o le a toe iai nisi moliaga faaopoopo o le a faia i ai, peitai e ao ona faatali suesuega o loo faia.
O le alii o Tautai Fata o le ave taavale a le NPF o loo molia i lona aafia i le faia o le gaoiga e ala i se la sootaga ma le alii o Sione. Sa tuuina atu e lana loia le afioga Leuluaialii Tasi Malifa, le tali tetee a Tautai i moliaga e tolu faasaga ia te ia, peitai ona o suesuega a leoleo e lei ma’ea, ua toe tolopo ai le tuuina atu o le tali tete’e ilea so 17 o Novema pe a toe fofogaina le mataupu. Faaalia e le alii loia o Leuluaialii e leo iai se noataga faaletulafono ise tasi e molia e faatuai ona tuuina atu sana tali, tusa lava pe e lei maea suesuega a leoleo.
Tufaga tupe
A o talia le aso 17 o le masina nei e toe valaau lenei mataupu, ua faaalia e se molimau faatuatuaina, o se tasi o uncle o le alii o Sione na ia muamua faafoi atu i leoleo se tupe e tusa ma le $30,000 lea e faapea na avatu e le ua molia i le taeao o le Aso Gafua na tupu ai le gaoiga, ona e faapea e silafia lelei e le na ave i ai le tupe le talaaga o le alii o Sione i le itu i solitulafono. O le vaega muamua lea na amata ai loa ona maua e leoleo se alafua e agai i ai a latou suesuega ma vave maua foi i laua ua molia nei.
Faaalia foi e se isi molimau mai le ofisa o leoleo ua fiu suesuega ma fesili faatauanau e le o ano ane lava Sione, i lana tala na te leiloa se isi seleni e ese mai le tupe ua toe maua, ma tupe na ia totogi ai le taxi na malaga ai i Gagaigo Lefaga, i se tasi o ona aiga o loo nofo ai, lea na maua i ai e leoleo ia latou sailiga. O le susuga Tautai Fata, na faatoa pueina ma taofia i le Aso Tofi, i le tuanai o le tolu aso talu ona tulai mai le gaoiga, ma e taofia o ia o loo i Savaii i le aveina o le au totogi penisione.
Faaalia e se isi molimau sa iai se feiloaiga a i laua nei e toalua i le Aso Toonai a o lumanai le Aso Gafua i le vaveao na osofaia ai le ofisa o le penisione. O se feiloaiga e lei mafaufauina, ae ona o le va lelei o i laua i se masaniga a o taufai tuli o la faasalaga faalepuipui i ni tausaga ua mavae. O loo iai foi ni molimau e faapea sa ulufale le alii o Sione i le ofisa o le penisione i le Aso Toonai lava lea i lona fia iloa o mea oi totonu o le ofisa. O le a faatoa mafai ona manino le mata o le vai pe moni nei faamatalaga a molimau na latou maua ni tala i le mea tonu na tupu, pe a fofogaina lenei mataupu ma valaau molimau a leoleo.
