O se tasi lenei o mataupu na oo lava i felafolafoaiga a le Palemene o le atunuu ua laga ai ona o le popolega i le vaaia pea o le toatele o le aufaigaluega aemaise a le Malo ua aafia i faiga faasolitulafono a o galulue ai i ofisa eseese a le Malo.
O le Tautua Samoa lea na laga lipoti o ni tagata faigaluega a le Malosiaga Tau Eletise (EPC) ua faasala faafalepuipui nei ona o le lima tagovale i tupe a le malosiaga. O loo iai foi nisi o le matagaluega o leoleo o loo suesueina i nei lava tuua‘iga.
Ta‘ua e le alii Palemia e toafitu i latou o le Malosiaga tau Eletise o loo aafia i lea faiga ae e lē o laga mai i luma nisi foi suesuega. Ua sola i Niu Sila se tamaitai o loo ua tau saili mai i le ave o tupe e maua atu i tino maliu taofia i le falemai i Tuasivi ma tupe ao o siaki o gasegase na fai ai se faaputugatupe mo nonogatupe a le au faigaluega o le falemai. E sue atu ua alu i fafo ae o lea e tele le pu o le tupe e tatau ona maua e le falemai.
E lē na o ofisa foi o le Malo lea e feagai ma faafitauli o tagata ua gaoi a o galulue i ia falefaigaluega. O loo ua falepuipui nisi o le kamupani gaosi ava o le Vailima ona o se gaoiga tele na faaaogā ai uta felaua‘i o fagupia ma faguinu.
O loo faaauau lava suesuega o lenei gaoiga tele ae ua falepuipui ai nisi o le aufaigaluega ma nisi na faapea ona fesootai i nei fefaatauaiga. E toatolu nisi na galulue mo le o faletaavale o le ASCO Motors i Savalalo o loo ua taofia foi faafalepuipui ona o seleni foi ua sue a lea faletaavale tele.
O se isi foi tamaitai talavou mai i le motu tele sa faigaluega mo le TVTasi a Mulinuu lea foi ua faamalolo ona o le se‘i atoa o le tupe a le aufaigaluega sa lafo i le tausaga atoa. Silia i le $30,000 le teugatupe ma o loo tau suesue pe lē o aafia ai ma tupe a le kamupani i lea gaoiga.
E matuā tele ofisa ma o lea foi e ta‘ua le suesueina o se gaoiga tele foi i pepa totogi telefoni a se tasi o kamupani telefoni feaveai i Samoa peitai o loo faapea mai lava le kamupani e leai se tulaga faapea o tulai mai e ui o lea ua iai nisi o leoleo o loo faagasolo le suesuega.
O le faamatalaga a le au suesue, o le faamatalaga lava o loo avane e le toatele o loo ua taofia ma o loo suesueina pea i le taimi lenei o le lē lava o le faasoa ua agai ai e fai lea tulaga solitulafono ua lē talafeagai le totogi ma manaoga o le aiga.
Ia e lē o faamaonia nei tulaga se‘i vaganā ai moliaga ua faia faasaga ia i latou.
