O le Kolisi a Lefaga ua māua i se ripoti o le vaiaso talu ai le tulaga maualuga ua ausia e alo ma fanau na sueina le suega mo le Vasega 13.
O le Kolisi lenei a Lefaga o le uluai tausaga lea ua faavaeina ai le Vasega 13 e pei ona fuafuaina e le Malo i le vaai mamao ina ia manuia alo ma fanau a le atunuu.
E pei ona silafia le lagalagā ai o le tele o finagalo ina ua faia le faaiuga a le Malo ina ia faa Kolisi uma ai aoga faa Itumalo i totonu o le atunuu.
O se fuafuaga na matuā faaalia ai le lagolagoina e le Ofisa Sili o le Matagaluega o Aoga Falanaipupu Tanielu Aiafi.
Na saunoa Falanai e faapea, na te toe faafetaia le Malo e tusa o le faautautaga mamao na afua ai ona faakolisi aoga i tua.
A fua i le faaiuga o suega a tamaiti nei mai le Kolisi a Lefaga o se tulaga maualuga pe a tatou vaavaai atu i ai aemaise o le taimi muamua a o lea ua matauina le tulaga lelei.
Na faaalia e Falanai o le naunautaiga lava lea o le Malo ina ia aoga pea le tamaitiiti ia i lona itumalo ma mafuta ai i tafatafa o mātua, nai lo le sau i Apia ma pisia ai i taaga ma faasolo atu ai ina aafia i soligatulafono.
O le lava o le taimi mo meaaoga o le isi lea itu na matuā lagolagoina ai e Falanaipupu le suiga lelei lenei a le Malo auā e mafai ona faatino aoga afiafi poo le ā lava le taimi e tuua ai, leai se mea e faapopoleina ai auā foi o la lava ei totonu o le itumalo.
O le Kolisi lenei a Lefaga na faailoa mai i le tatou Nusipepa le tulaga maoae na ausia e alo ma fanau na sueina le Vasega 13.
E faapea le tala e 13 le aofaiga o le vasega, mai lea aofaiga e 9 i latou ua faamanuiaina mo le UPY poo le Tausaga Faavae mo Iunivesete i le Iunivesete Aoao o Samoa, e toa 2 ua ofi atu i le Aoga Faafaiaoga ma le isi toa 2 ua sauni e ulufale atu mo le Aoga mo Mataupu Matataeseese i le Iunivesite lava.
E lei manuia taumafaiga mo se finagalo o le tamaitai pule o le kolisi ae na o se tasi o faiaoga na mafai ona ia faamaonia mai lea tulaga lelei ua ausia e le latou kolisi i lenei tausaga.