O le manulauti ma le faamoemoe maualuga o le Lotu Faamanatu o le aiga o Futi i Faleu i Manono i tausaga taitasi, o le soosoo pea lea o galuega lelei ma le faafealofaniga o aiga e pei ona amata mea mai ai mātua ia Futi Sapati ma le tina ia Faiane Futi. 

E faapea se tala sa galulue le tama ma le tina i le galuega faafaifeau i le ekalesia Metotisi, peitai ane ua maitauina e le tamā ia Futi Sapati le tulaga ua iai lona aiga i lea vaitaimi, ua amata ona ta’ape’ape tagata o lona auaiga ma ua tauau ai ina lēe maua se mafutaga a tagata matutua faapea foi ma fanau.

Ona lagona lea e le tamā ua tatau ona toe foi se’i fai se galuega e faamaopoopo ai lona aiga, ma o lea sa faamavae atu ai loa i le galuega faafaifeau ae see atu loa ma tausi lona aiga i Manono faatasi ai ma le tina ia Faiane. 

O le galuega na fai e nei mātua na laua faatuina ai se lotu faamanatu i totonu o le aiga i Faleu Manono e toe talo uma ai le laua fanau ina ia maua se maopoopoga lelei ma se nofo fealofani. 

I le fa tausaga talu ai na faamanatuina ai e le aiga o Futi le atoaga o le selau tausaga talu ona faatuina mai lenei lotu faamanatu i totonu o le aiga ua oo mai i lenei tausaga o loo faaauauina pea lea galuega lelei e fanau e manatua ai pea le saili malo o mātua i tausaga ua mavae.

E toafitu i latou na tupuga mai i le tamā ia Futi Sapati ma le tina ia Faiane, e toafa tama ae toatolu teine. Ua maliliu uma.

O le faaauauina o le lotu famanatu a le aiga i lenei tausaga, o lea ua seei mai le augatupulaga lona lima, e pei ona iai le tamā ia Talifaifo Salesa, Talifaifo Luapule ma nisi o le aiga i le faamaopopoina o le aiga i le taimi nei, ua mavae atu le augatupulaga 1, 2, 3, ma le fa sa latou tauaveina mai le lamepa ua toe lava o toe Sava’ii Tina ia Leo’o Matamua ma le Tina Ruta Tausili, a’o lea ua pasi mai le fu’a i le augatupulaga lona lima lea lava e sosooina le maopoopo e pei ona masani mai ai i le amataga.

Ua ulu ola ma ua tupu le aiga ma ua vaaia ai faamanuiaga i totonu o le aiga i le tele o fanau ua mafai ona sosooina le galuega faafaifeau a mātua na laua asaina le gasū o le taeao. 

Ua lē gata i le ekalesia Metotisi a’o nisi o tovine o lea ua mafai ona faaauauina ai le valaauina o fanau i le galuega a le Atua. 

O le tasi lea auga o aute o le faamoemoe o le aiga i lenei lotu faamanatu ina ia faanōnō manū i le Atua, ina ia tupu pea faamanuiaga i totonu o le aiga ma ia maua le nofo fiafia ma le nofo fealofani. 

E tolu fale tama sa auai i le faamoemoe o le aiga i lenei tausaga e ala i le Lotu Famanatu lea sa faia i le malumalu o le ekalesia Metotisi i Otara i le taeao o le Aso Sa ua mavae. 

O Futi Pepe, Futi Faleu ma Futi Naomi, o nisi o fale tama sa lē mafai ona auai ona ua nonofo i latou i Ausetalia ae o nisi o Samoa. 

O le tele la o tausaga e faamanatuina ai le Lotu i le aso 10 o Aperila e pei ona masani mai ai, e fai foi la le lotu i Samoa e fai le lotu i Niu Sila nei. 

E lē mafai ona mu itiiti le vavae o le lamepa i totonu o le aiga aua sa faavae mea uma i le Atua, lea lava ua oo mai i le taimi nei o loo tausisi ai pea le aiga i le faavae na tauasa mai ai mātua. Ua manuia le aiga mai mauga tetele seia oo lava i fanau iti. 

Ua maua le fealofaniga i fanau aua o le lumanai lea o le aiga ma le nuu faapea ekalesia eseese o loo galulue ai. Aua o le tasi lea lagona o mātua ia Futi Sapati ma Faiane, poo fea lava le ekalesia e galulue ai pau le lagona ia laua mātua ia faaaogā le ola mo le Atua.

O le tausaga fou lea ua iai le faamoemoe o suli o Futi Sapati e lua aso o le a faia ai le reunion a le aiga e faamausali ma faamaopopo ai pea le aiga e pei ona sau ai.

Faamatalaga na tuuina mai