Lē iloa se vaitaimi mo se Vaalele a Samoa

Tuia Paepae Letoa, sui taitaifono a le Samoa Airways

E lē o lata mai se vaitau e maua ai se vaalele o le a fai ma vaalele a le atunuu, talu ona afaina fuafuaga a le malo i le vaalele lea na lavea i Ethiopia ma maliliu uma ai le pasese.

O lea na faamaonia mai ai e le sui ta’ita’ifono o le Kamupani Vaalele a le Samoa Airways Tuia Paepae Letoa, o le a silasila e faaauau pea fuafuaga o loo iai i le taimi nei a le kamupani, o le faaauauina pea o fuafuaga o le tau sailia o se vaalele e na te faaauauina femalagaa’iga a le Samoa Airways.

Saunoa Tuia, o le mea mautinoa lava ia, ua mae’a uma fuafuaga a le malo na fai, ma tapena mo le aumaia o le vaalele ae na tupu mai loa le faalavelave o le vaalele lea na pa’ū ma maliliu uma le pasese, afaina loa ma tapenaga.

Peitai o le faaiuga o le vaiaso na faamavae mai ai le ta’ita’ifono o le Samoa Airways le afioga Feesago Siaosi mai lona tofiga. 

Ma na fesiligia le afioga Tuia i le mafuaaga, ae na ia faaalia e na te lē iloa le mafuaaga, na faate’ia o ia, ina ua momoli atu le faaiuga a le Kapeneta e faailoa atu ai le tofiaina o ia e avea ma sui ta’ita’ifono.

O le taimi nei o le vaalele mai Melenisia le Melindo Airways, o loo lisi i se taimi puupuu, ma e faaono toe iloilo le tautua a le Melindo Airways pe a mae’a le 3 masina o loo lisi mai ai i le Samoa Airways.

E lei mafai ona faailoa mai e le sui ta’ita’ifono, poo le ā se aofai o loo lisi ai e le Samoa Airways le Melindo ae na ia faaalia, o tulaga faapea a puupuu toe vave se taimi na faatino ai o lona uiga e lē taugofie, ma e lē faigofie foi lona tau.

“Aemaise la pe afai o le taimi lea na tupu ai le faalavelave toe manaomia vave se vaalele mo Samoa, ua tau fai felelei uma i luga tau o lisi a kamupani vaalele.”

“Lea la o loo faia fetuunaiga, ae mo le Komiti Faatonu, atoa ai ma le pulega a le Samoa Airways o le matou fuafuaga numera tasi, o le saogalemu o tagata uma aemaise si o tatou atunuu.”

O le Komiti Faatonu a le Samoa Airways e aofia ai Feesago Siaosi Fepuleai lea ua faamavae, Tuia Paepae Pu’a Letoa, Vui Seinafolava Laniselota Lameko, Nuusa Berger Amituanai, Onosefulu Fuata’i, Anne Aiolupotea, ma Tusa Aiono Misi Tupuola.

Na ta’ua e le ofisa o le Samoa Airways, i Apia, o le puaoa o le tau na ala ai ona alu sa’o le vaalele i Christchurch, ona fai ai lea o galuega faamamā ma toe utu na afua  ai lona tuai.

E silafia lelei, o le leaga o le tau e leai se mea e mafai ona faia i ai, o faaeteetega lava ina nei iai se mea e sili atu ona leaga e tupu ai. 

O loo malaga le alii Pule Sili, Seiuli, masalo a taunuu mai i le Aso Lulu ona maua ai lea o se isi faamtalaga i lea mataupu.