Faaaogā avanoa ua maua i Niu Sila

Pisia Masealii, Anita Lealaiauloto-Falefitu ma Luatasi Topi Moe Auvaa-Sakaio

E 32 vaiaso na a’otauina ai nisi o faiaoga i le Unitec i tusipasi o le Postgraduate Certificate in Applied Practice, i le faaaogāina o polokalame faatekonolosi faaonaponei i luga o computers ma le online (Digital and Collaborative Learning). O se avanoa ua toe sailiili ai nei faiaoga i nisi o avanoa ua aumai e Niu Sila e toe faalautele ai le poto salalau i le faaaogāina lea o masini nei ua tele ina faaaogā i nei ona po.

E lē gata i le faalauteleina o le malamalama i auala faatekonolosi  i nei vaitaimi ae o le avanoa foi lea e mafai ai e faiaoga ona latou toe a’oa’oina a latou tamaiti aoga i luga o computers ma laptop e aunoa ma le toe o mai o nisi tagata e a’oa’o a latou tamaiti aoga, o lona uiga o se avanoa sili lea i fanau e mafai ai ona a’oa’oina i latou i polokalame eseese i luga o nei auala faatekonolosi. O le lagona o nei faiaoga ua lata mai le taimi e lē toe faaaogāina ai e fanau aoga le tusitusi, ae faaoagina suiga fou nei. Ma o le ala foi lea o le naunau lava ia faataunuu lea moe mitiga lelei ina ia mafai ona latou faasoa atu i fanau aoga lenei iloa ua latou maua. O lona uiga o soo se ituaiga polokalame e faaaogāina ai masini nei o lea faigofie ona fai a’oa’oga a tamaiti aua o lea ua lava lo latou malamalama e faatino ai lea a’oa’oga mo fanau. i le taimi nei foi ua tele atu le faaaogāina o auala faatekonolosi  nei i totonu o aoga nai lo le faaaogāina o le tusitusi.

E lei faigofie i faiaoga le amataina o lenei course i lona amataina auā sa tele le taimi e alu ai, e usu i le taeao i le aoga ona uma lea o aoga ae toe faaauau le course i le tuua o aoga seia oo lava i le afiafi. E tausaili se taimi e malolo ai aua e fai o le pisi i le aoga, ae o le pisi foi i le faiga o meaaoga. Peitai e leai se mea e maua ma le filemu, a le tigaina e lē maua lona taui lelei. O le fua foi e lulu e toe seleseleina. E ui i le faigata ma le lavelave faatasi ai ma le tau leai ma se taimi ma le aiga ae na silafia e le Atua le naunautaiga o nei faiaoga ina ia tini lau o le faamoemoe ma le manatu maualuga e iai le taimi ma le aso e seleseleina ai le tautiga. 

O avanoa o mea e maua gata i totonu o Niu Sila, o avanoa foi i a’oa’oga i nei atunuu o mea e tatau ona faaaogā lelei e tatou tagata, ia aua nei faalogologo tiga, aua foi nei vaavaai i le matua ua iai, ae o avanoa e toe faalautele ai le malamalama, siitia ai le tulaga i totonu o galuega aemaise o le tupe maua i totonu o aiga. O a’oa’oga e leai sona mutaaga i totonu o atunuu nei, ae pau le mafuaaga o le taimi e tatau ai ona faaaogāina avanoa.

O le course na ofoina mai e le Unitec mo aoga taitasi, ae sa iai foi la aoga sa faapitoa i ai le talimalo i lenei course, ma sa saili lava e aoga vaega sa faapitoa i ai le a’oa’oga e agai i ai e galulue faatasi ai faiaoga uma ina ia maua se faamāmā avega i le galulue faatasi, ina ia mafai ona fesoasoani le tasi i le tasi ma faafesoaai i alagoa ma mea e tatau ona agai iai. E ui lava la i le faigata ma le tele o faafitauli ae sa iu lava ma le manuia le taumafaiga a faiaoga sa latou finauina lea avanoa i totonu o Niu Sila e ala i nei avanoa. E mafai mea uma i le faatasi mai o le Atua ia te i tatou.

O le Aso Lulu o le vaiaso ua mavae na faamanuiaina ai loa i latou poo faiaoga mai aoga taitasi sa aotauina i lea course mai le Unitec. O le aoga tulagalua a Mangere East e toafitu faiaoga sa faauuina ai, e toatolu faiaoga Samoa sa faaiuina lo latou taumafai o le faletua ia Anita Lealaiauloto-Falefitu, Pisia Masealii ma Luatasi Topi Moe Auvaa-Sakaio.

O le agaga faafetai o nei faiaoga i le Atua ona ua faaiuina ma le manuia le tausinioga sa feagai ai ma i latou, auā ana le seanoa le Atua e lē mafai ona taunuu i le auga o aute o le faamoemoe, o le latou faafetai foi i o  latou aiga ona o le tapuaiga ma le nofo tatalo ua manuia ai mea uma, aua e lē sili le ta’i nai lo le tapuai e pei o ia upu. Molimau foi le afioga a le Atua, ‘A lē atina’e e Ieova le fale e galulue fua i latou o e atina’eina, afai e lē leoleoina e Ieova le aai, e mataala fua o le na te leoleoina.’