“O se mea uigaese lenei ua fuli ai tua o nisi Minisita ma faipule o le HRPP e teena se teuteuga ua faatu mai e le Malo”
Ua taunuu le vevesi o le Palemene i lana tauaofiaga i le masina o Aperila i le filemu o taualumaga o lenei masina o Me ina ua fulisia le lua vae tolu o nofoa e 49 e palota tete’e i le teuteuga na fa’atu atu e le Minisita o le Ofisa o le Komesina o Faigapalota faasino i le tuaoi o le itumalo tu taulaga o Faleata, lea na amata atu i Vaimoso e oo i Vailoa ona gata ai lea ae agai i uta ma oo atu ai i Aleisa.
O le vevesi lea na mafua ai ona ave le teuteuga i le komiti faapalemene mo ni finagalo faaalia o le atunuu, ae tafea le fuafuaga sa iai muamua ia avatu i le Palemene i se tulaga faanatinati ma pasia loa.
O le galuega a le komiti filifilia a le Palemene na tauaao atu ai le latou lipoti ma fautuaga i le Palemene i le Aso Lua, 26 o Me 2015 ma soalaupule ai. O le fautuaga ia tatala le tuaoi o le itumalo tu taulaga o Faleata ma Vaimauga lea ua oo atu i isi nuu o nei itumalo sa lē aofia muamua.
Na lagona i le saunoaga a le tamaitai Minisita e ana le teuteuga lona atugalu i le fautuaga ua avatu ona e iai vaega e faavae ai. O le fautuaga a le Loia Sili ma faamaumauga o loo iai i le tuaoi tonu o nuu e lavea i le lio o le taulaga.
E ui i sea lagona o le minisita ae sa ia faailoa i le Palemene lona talia o le fautuaga. Peitai ona o aiaiga o le Faavae e tatau ona faia se palota tauvala’au e sa’ili ai le finagalo fulisia o le Palemene, na faatino ai loa le palota tauvalaau.
O le faaiuga e toalima Minisita o le Kapeneta ma minisita lagolago e toa sefulufa na tutu faatasi ma le toa sefulutasi o faipule o le Itu agai e lagolago le fautuaga a le komiti i le tatala o le tuaoi, ma togi ai i fafo ma solipala le teuteuga dna faatu atu muamua.
O sui faipule o le HRPP na lagolagoina le teuteuga fou o tuaoi o itumalo tu taulaga e aofia ai, Tuisugaletaua Sofara Aveau, Tolofuaivalelei Falemoe Leiataua, Lemamea Ropati, Faamoetauloa Dr Faale Tumaalii, Magele Mauiliu, Leaupepe Toleafoa Apulu Faafisi, Tuuu Anasi’i Leota, Faumuina Faaolatane Tiatia Liuga, Lafaitele Patrick Leiataualesa, Faimalotoa Kika Stowers Ah Kau, Tuisa Patea, Lenatai Victor Tamapua, Sooalo Mene, Ifopo Filisi, Tialavea Schwatz Hunt, Tusa Misi Tupuola, Tafua Maluelue, Gatoloaifaana Amataga Gidlow, ma Agafili Patisela Eteuati.
O sui faipule o le Tautua Samoa ma le Itu agai, o Tuileutu, Papalii Li‘o Ta‘eu Masipa‘u, Afualo Woods Salele, Tapuai Toese, Motuopuaa Aisoli Vaai, Aeau Peniamina, Palusalue Faapo II, Aveau Niko Palamo, Levaopolo Talatonu, Lealailepule Rimoni Aiafi, ma Toesulusulu Cedric Schuster.
O faipule na tetee e aofia ai le afioga i le Palemia ma le sui Palemia, susuga Tuilaepa Sailele, Fonotoe Nuafesili Pierre Lauofo, Fiame Naomi Mataafa, Tuiloma Lameko, Lautafi Fio Selafi Purcell, Manu‘alesagalala Enokati Posala, Sala Fata Pinati, Fagaivalu, Tufuga, Alo, Afoa Fouvale, Taefu Lemi, Maualaivao Pat Ah Him, Peseta Vaifou Tevaga, Seiuli, ma Papaliitele Niko Lee Hang.
Talia teuteuga filifilia o se Ao o le Malo
O le teuteuga o le faavae e faasino i le filifilia o le Ao o le Malo, le Fofoga Fetalai ma le Sui Fofoga Fetalai na silia foi i le luavaetolu o nofoa o le Palemene na lagolagoina. O le suiga lea o le a ave ai le filifiliga o nei tofi aemaise lava le Ao o le Malo i le vaega faaupufai ua iai le numera manumalo o nofoa o le Palemene e avea ai ma faigamalo.
E manino mai i le teuteuga lenei o le faavae o le a lē toe faatutuina atu ni sui e faia i ai le filifiliga, ae a mautu loa le filifiliga a le vaega faaupufai ua tu e avea ma faigamalo, ona tuuina atu lea o le latou filifiliga i le Palemene mo le taliaina i
tulaga aloaia.
