Sa eseese lava le faatinoina o polokalame a Faletusi taitasi i le faatinoina o le aoaoina o le Vaiaso o le Gagana Samoa e pei ona faamanatuina nei. O le manulauti ma le aano moni i totonu o faletusi ia mafai ona aoaoina le gagana Samoa i tamaiti aoga laiti aemaise foi o aoga maualuluga.
O faletusi o se nofoaga lea o loo taula i ai tamaiti aoga mo le faitauina o tusi aemaise foi o tagata matutua. Ma o se sao lelei foi lea mo nei auaunaga e faailoa ai lo latou lagolago i le tāua o le Gagana Samoa i totonu o lenei atunuu. Sa tofu lava la le faletusi ma latou galuega faatino e kiliva ai le tāua o le Vaiaso o le Gagana Samoa. O nei polokalame o loo galulue faatasi ai le ofisa o le Council ma faletusi taitasi i totonu o Aukilani.
O nisi o faletusi o tamaiti aoga laiti (aoga amata) ae aofia ai ma tagata matutua, sa latou aoaoina le faatinoina o siva Samoa. O nisi nofoaga na faaaogāina TV ma galuega tusitusi e aoao ai le gagana Samoa, e pei o le tatalo i le Tamā i le Lagi, o upu taitasi, tofa, faafetai, talofa, o upu faigofie ma faaaogā i aso uma e mafai ona pue ma maua gofie e fanau, o le faitauina o tusi Samoa o loo i totonu o faletusi aemaise ai o felafolafoaiga o manatu o tamaiti i ni autu Samoa i lona tāua. O nisi o alo ma tamafanau o Samoa o loo galulue i totonu o faletusi sa latou faatinoina nei polokalame i nei nofoaga. O le sini ia mafai ona tautala le tamaitiiti na fanau i Niu Sila nei i le gagana Samoa aemaise ai ia iloa le tupuaga o lona aiga ma lona faasinomaga.
O le tāua foi o faitauga tusi, ua iloa ai e fanau le faigata o Samoa a o pulea e isi atunuu, ma ua avea ai o se avanoa e fesilisili ai i mātua ma aiga e faalautele ma fia iloa le amataga o le olaga i Samoa. O nisi o aiga Samoa e iai o latou piitaga i isi atunuu auā o loo maupaolo ai a latou fanau, ae ua avea lenei polokalame ma auala e aoaoina ai foi le gagana Samoa i nei mātua, e pei ona molimauina i totonu o nisi o faletusi. E iloa oe o le Samoa moni i lau gagana, tu, lau savali ma lau amio, e lē tau fesiligia lou atunuu ma lou tupuaga, aemaise ia e malamalama i lau aganuu Samoa auā o se tasi lea o molimau ola e mafai ai ona agai tagata o atunuu i fafo ma asia laufanua o Samoa. O tausaga uma lava o loo faatinoina ai pea le Vaiaso o le Gagana Samoa i Aoteroa, ma o se tumutumuga lea i tagata Samoa uma o loo aumau iinei le faatāuaina o le Gagana Samoa ma ana measina.
Auā e lele lava le toloa ae maau i le vai, o le Samoa moni foi e susue lava lona faamalama ma vaavaai i le mea na soifua mai ai.
