Rugby 7’s
Auro Alii – Fiti
Auro Tamaitai – Fiti
Ua pule Fiti i malae lakapi o Samoa ina ua manumalo uma i pine auro o le Taitoafitu a Alii ma Tamaitai. I le taaloga faaiu a Teine o Fiti na malo ia Ausetalia 14-5. A’o le taaloga autū a tama na feiloai ai Fiti ma Samoa mo le pineauro, o Fiti na malo i ‘ai e 7-5, e ui e toalua tama o le ‘au a Fiti na faasala i le pepa samasama.
O le itu e lē manaia, ona e lē o le aufili lea a Fiti na taaalo i le World Series a’o le ‘au lona lua lea a Fiti na faatamo’e i Samoa ma manumalo ai. Ua sosoo ai pine auro a Fiti i taaloga a le Pasefika, auā na manumalo foi i Papua New Guinea i le 2015.
Na iai le avanoa e tele e manumalo ai Samoa, a’o toaono tama Fiti i totonu o le malae. Peitai na tetee e Fiti osofaiga a Samoa ma le loto finau. O lea finau a Fiti na talanoa i ai le faiaoga a le Manu Samoa 7s Sir Gordon Tietjens i le iuga o le taaloga.
“E ese le taalo a Fiti i le taaloga lea, na matuai malu le latou puipuiga o le latou laina. Na matuai fiu Samoa e saili avanoa atu i le laina sikoa a Fiti.”
Na ioe ma Gareth Barber le faiaoga a Fiti i le tomai o lana ‘au e tetee ai le Manu Samoa.
“Na matou iloa lava le faigata e oo i ai le taaloga ma Samoa. Ae o le lesona tāua tele mo matou, o le auala na pulea ai e Fiti aafiaga o latou lagona i le taimi o le taaloga o le leo tetele o le aumaimoa lagolago ia Samoa, aemaise ai le taimi na faasala pepa samasama ai tama e toalua a Fiti.” O tulaga ia na faavae ai le manumalo a Fiti. Na ta’ua e Tiejent, e leai se eseesega o le vevela o le taaloga i le Aso Toonai i Lotopa ma taaloga faaiu a le HSBC World Series e tauva ai Samoa ma Fiti.
Ae na toeitiiti foi mamulu le avanoa e sao ai Samoa i le taaloga faaiu ina ua tutusa ma Toga i le taaloga faaiu o le Aso Faraile e ta’i 12-12 ‘ai. A na faia’ina Samoa i le taaloga lea ma Toga e lē au Samoa i le sailiga o le siamupini.
Taamilosaga a Tamaitai
Na faigata lava taumafaiga a Samoa ina ua pa’ū ia Ausetalia i le Pool A 0-38. E ui na manumalo le ‘au i isi taaloga e lua, Samoa 20 New Caledonia 0, faapea foi le taaloga ma Amerika Samoa na malo ai i ‘ai e 41-0, ae o Ausetalia na manumalo i le pulu.
I le semi na taalo ai Samoa ma Fiti ma manumalo ai Fijiana i ‘ai e 31-0. Ae manumalo Ausetalia i le Semi ma PNG 31-7.
I le taaloga faaiu ma Ausetalia o Fiti na to’a le taalo e pei o le ‘au a tama ma manumalo ai 14-5. O se manumalo maoa’e auā o le ‘au a Ausetalia na manumalo i le pine auro i le Olimipeka o le 2016 i Rio.
Na iai le avanoa e maua ai se pine a Samoa i le taitoafitu a teine auā na sue Samoa ma Papua New Guinea le apamemea, ma malo ai PNG i ai e 28-12.
