E ui e lei mafai e le taitai o le atunuu, Tuilaepa Lupesoliai Sailele Malielegaoi, ona oo atu i le taamilosaga mulimuli e saili ai sana pine i lana taaloga o le fanafana aū, ae o loo mau lava le talitonuga o le alii Palemia o la lava e iai isi ana pine e lei uma atu.
O le Palemia a Samoa o le tagata taalo a Samoa aupito matua i tama ma teine taaalo o le Pasefika na faateia ina ua tauaao atu iai faameaalofa e le tamaitai o Jil Walter lana pine auro na maua i le la paga fefiloi (mix team) ma lona tamā, Muaausa Joseph Walter.
Na faaalia le agaga fiafia o le Palemia, ma ia faafeiloai atu i le tamaitai o Jil, ma ia sisiina i luga le pine auro ma ia sogi atu iai, e faaali ai lona agaga faafetai aemaise lona agaga fiafia e lē gata ua pine auro sui o Samoa, i le fanafana fulu aū, ae o lea ua tauaoo atu e le tamaitai o Jil lana pine auro mo ia, sa tatau ona ave e teu faasuvania e faamauina ai le maoae o lana taumafaiga i lenei tausaga.
Na saunoa le alii Palemia, ma ia faalaeiau atu ia Jil ina ia ona faatāuaina lana taleni i le taaloga, ma ia manatua le igoa o Samoa ua avea ai nei ma ave fu’a o le tamaitai muamua lea na ia maua le pine auro a Samoa, i le vaega taitoatasi a tamaitai i le vaega o le recurve bow.
Na faaalia e Jil lona agaga fiafia ma ia faaali atu i le Palemia lona tuuina atu atoa o lana pine auro mai le la ‘au ma lona tamā e fai ma meaalofa atu ai mo ia, atoa ai ma lona loto atoa o le a tuu i lana taaloga ma e faaauau pea ona taaalo mo lona atunuu o Samoa.
Na soisoi le alii Palemia, ina ua fesiligia e le Samoa Times, poo se tasi lea o ana pine, ae na manino le saunoaga a le Palemia, o se tasi lea o vaega tāua o le faalaeiau atu i le autalavou ina ia agai mai e faaaogā lo latou talavou e avea ma sui o Samoa i soo se taaloga.
“O le taaloga nei o se taaloga ua leva ona i Samoa ae ona o le malolosi tele o ‘au ia a atunuu mai fafo pei o Niu Kaletonia ma Tahiti, ona e iai a latou taamilosaga e faifai pea ae mo Samoa na o le pau a lea o le taimi na tapena ai Samoa, toe o nai vaiaso fai taaloga, ae o le a iai le faamoemoe o le a fai se suiga mo tatou, o le a fai foi a matou taamilosaga faapea i le tausaga, e fai ane isi taaloga ua lē toe iā latou le malosi ae ua saga faaopopo ai le malosi i le matou au. Faafetai i le tapuaiga ale atunuu aemaise tatou tupulaga talavou, i le faaavanoa o latou taimi e taaalo ai mo le atunuu.”
O le ‘au mix a Samoa, o le alii ma le tamaitai lea na tuu e tauva ai le Palemia Tuilaepa Lupesoliai Sailele Malielegaoi ma lana paga le tamaitai o Naifoua Timai 18 tausaga le matua i le Aso Faraile na te’a nei i le pine apa memea, peitai na faamaamulu le Palemia mai le la paga ma Naifoua, ae ona tuuina atu le avanoa i le alii 17 tausaga le matua o Mathew Tauiliili e sui tulaga ia te ia. Saunoa le Palemia ina ua mae’a le tauvaga ma ia faamanuia atu ia Mathew ma Naifoua i le mae’a ona ia faaulaina i le apa memea, o le mafuaga tonu lava lea na ia manatu ai e tuuina atu le avanoa ia Mathew,o na o lona naunau e tuu le avanoa i tupulaga talavou a Samoa e taaalo ai ma fai ma sui o le atunuu.
O ia ua 75 tausaga o lona matua, ma e lē o toe malosi tele foi lana meme’i e pei o le meme’i a le autalavou lea ua taaalo nei. “O a’u e ala ona ou auai i le taaloga lea o le taumafaiga ina ia toso atu le tupulaga e auai i lea foi taaloga mo Samoa.”
O Samoa ua faatulaga mai i le tulaga lua i le faatulagaina o taaloga o le Pasefika ae o loo tulaga muamua le ‘au a Niu Kaletonia, ua mae’a tuuga ‘aau, mae’a kilikiti palagi, mae’a faataavalega polo, o le siisii uamea mamafa, ae o le vaiaso nei o le a faagasolo ai afeleti, netipolo ma isi taaloga e pei o fusuaga e faia i Savaii.
