E matautia faiga a Tahiti i le taaloga tuuga vaa, poo le alo paopao. I pine auro e 12 o le taaloga a tama ma teine na manumalo ai Tahiti i auro e 10. E lua pine auro na maua e New Caledonia. O gataifale o Mulifanua na fai ai tuuga nei i le ogasami lava lea na fai ai le tuuga ‘aau 5km i le Aso Gafua.
O pine e tolu a Samoa na maua e lua na na maua e Anne Cairns i tuuga taitoatasi o le 500m a tamaitai, ma le tuuga mamao o le 16km.
O le isi pine a Samoa o le pine apamemea na tu tolu ai le vaa a tamaitai e 12 nofoa (V12). O le uluai pine foi lea a Samoa na maua i taaloga o le Pasefika 2019. E tolu ai foi iina ma pine a Anne Cairns auā o ia o se tasi o le auvaa o le vaa taitoa 12 a tamaitai.
A’o le malosi lava o le taaloga lenei o le ‘au alo mai Tahiti. Na manumalo Tahiti i le 24km malafoni a tama ma teine, 1500m a tama ma teine, lua pine auro i le 500m a tama ma teine, ma le malafoni a tama ma teine 16km.
E tāua tele tauvaga vaa alo na fai nei, auā o Samoa lea o le a talimalo i le Ipu o le Lalolagi i tuuga vaa alo, o le a faia lava i Mulifanua i le 2021. Na faamaonia lea faamanuiaga mo le atunuu i le fonotaga a le Asosi Vaa a le Lalolagi na faia i le masina o Iuni.
O le auvaa o le vaa V12 a tamaitai Samoa
Tafaifa Fuimaono
Anne Margaret Cairns
Moevanu Kelekolio
Frances Clara Grace Meredith Ah Kuoi
Filifilia Cecelia Fidow
Tauvaga Falagi
Seinia Sandy Time-Poliko
Tunu Nancy Matautia
Frances Mahealani Te’o
Moana Maria Schreckenberg
Jessie Lourdes Tupu Fua
Elsie Pesamino
