Ua faamanuiaina le ‘au Soka a tamaitai a Samoa i le pine siliva ina ua manumalo Papua Niu Kini i le taaloga faai’u. O le uluai pine foi lea a Samoa, tama poo teine, ua maua i le soka talu ona amatalia le Pacific Games.

Na manumalo Samoa ia New Caledonia 2-3 i le taaloga o le semi-final ma fetaui ai loa ma PNG i le sailiga o le auro, lea na malo ai PNC 3-1. E maoa’e le malo o Samoa ia New Caledonia, auā o le ‘au lea na pine auro i le soka a tamaitai i taaloga o le 2015.

I le taaloga ma PNG o Samoa na amata ma le malosi. E lua lelei avanoa na maua e le ‘au e sikoa ai peitai e lei sao le polo i tua o le neti. Ae o PNG na muamua sikoa auala ia Marie Kaipo ae e lei umi ae maua loa le sikoa a Samoa tutusa ai ‘ai o le taaloga. E lei umi foi ae toe faaopoopo ma le isi tasi a PNG auala foi ia Kaipo. 

O le sikoa lona tolu a PNG na maua e Ramona Padio. Na matuā malosi le puipui a Samoa semanu e tele ‘ai o PNG e maua. Na ta’ua e le faiaoga Nicola Demaine na lelei le taalo a lana ‘au, ae e lei lava le taimi e tapena ai mo le taaloga faaiu. O le talitonuga a le faiaoga ua matua lelei le maualuga lea ua iai Samoa aua e na’o le tausaga talu ai na faia’ina ai Samoa ia PNG ma Fiti e tai 5-0 ‘ai. Ae o lea ua taalo le ‘au i le final ma PNG. E ui e lei manumalo ae o se sikoa amanaia  le 1-3 o ‘ai faai’u o le taaloga. O Niu Sila na manumalo i le taaloga mo le pine apamemea ina ua manumalo ia New Caledonia.