Ua lē taulau le faamoemoe o Aunese Curreen e toe maua ni ana pine auro e faamavae lelei ai i lona atunuu ma taaloga o le Pasefika. Na faaletonu le taumafaiga a Aunese i le tuuga o le 1,500m ina ua se’i le maso o lona vae a’o toe 200m mai le tini o le tuuga.
Ae o le taimi foi lea na agai mai ai le tamo’e a Aunese i le tulaga muamua. Ae vaaia loa le tau sulu o Aunese ma vave pasia ai o ia e tama e to’afa. E toe taumafai mai lana tamo’e ua faigata ona toe maua mai tama ua muamua mai i luma. Semanu e toe maua e Aunese le pine auro na ia asoaina i le 2007.
Na foliga mai o taumafaiga a Aunese e faasaoasaoa le tuuga mai le 300m na mafua ai le faaletonu o le maso o lona vae.
Ae e lē o se manu’aga faato’a tupu, ae o se manu’aga ua leva ona tauvaeina e le alii taalo ae o lea ua toe tupu i taimi tonu o le tuuga. Na savali Aunese e faatini lana tuuga.
O le isi tulaga faanoanoa mo Aunese, e lei faaaogāina lona taimi na tamo’e ai, ona o le tami na tausulu ai na tu ai lona vae i fafo ma le laina, ma faaleaogāina ai lana tamo’e. Na mua Alex Beddoes o le Atu Kuki i le tuuga i le taimi 4min 03sec, e lei taitai ausia le taimi manumalo o Aunese i le 2007 i le 1,500m e 3min 53sec.
Na vaaia le faanoanoa tele o Aunese ma lona aiga uma i le mea na tupu. E ui i lea ae na ta’utino Aunese e tamo’e i lana tuuga na sosoo ai o le 5,000km. Na fia maua e ia se avanoa e faamavae ai i Apia Park ma le atunuu atoa.
I le 5,000km e 6 taamilosaga na gafatia ona tamo’e ai Aunese ona faamuta ai lea o lona taumafai ae faaauau pea le tuuga.
O Samuel Aragaw o Tahiti na mua i le taimi 15min 39sec. E saoasaoa lea i le taimi a Aunese i le tuuga lava lea i le 2007 e 16min 42sec.
I le mae’a ai o le tuuga na faafetaia ai e Curreen lona avanoa e toe tamo’e ai i Apia Park le malae e pele ia te ia ma ana taumafaiga i tausaga ua tea. Ua mae’a ai lana tautua i le Afeleti a Samoa.
Ua 37 ona tausaga, ua afu lana tautua i le atunuu i tuuga tamo’e.
