A’o aasa taaloga a le Pasefika i Samoa ae o loo faapea foi ona tausinio le ‘au netipolo a le atunuu i le World Cup i Liverpool, Egelani. Ua mae’a ai taumafaiga a le ‘au ma ausia ai le tulaga 13 ina ua manumalo ia Fiti i lana taaloga faaiu. O se tala fiafia tele lea mo le ‘au ina ua avea Samoa ma siamupini o o au mai le Pasefika.
I le taaloga ma Fiti o Samoa na manumalo i ‘ai 53-42. O le tamaitai o Auteletoa Tanimo na feagai ma tiute o le Goal Shoot ae fesoasoani i ai Sanita Too i le tulaga o le Goal Attack. Na matua faigata lava le taaloga ma Fiti ona o le manaia o le taalo a Fiti ma le maualuluga o teine Fiti i totonu o li’o e lua. Peitai na finau ma le malosi Geraldine Solia-Gibb and Lenora Misa na feagai ma le puipuia o le neti a Samoa. Ae o le isi itu o le tamaitai o Brooke Williams na taalo i le centre na galulue faatasi ma Ariana Luamanu i le Wing Attack e tulei le polo atu ia Too ma Tanimo.
O le faalua ai lea ona manumalo Samoa ia Fiti, i le taaloga muamua na malo ai foi Samoa i le ‘ai e tasi 55-54. E na’o le tasi le kuata na finau ai Fiti ma sili ai ‘ai, o isi kuata e tolu o le taaloga, na silli lava ‘ai o Samoa.
O isi taaloga a Samoa na fetaui ai ma Sri Lanka manumalo Samoa 65-55. Ao le taaloga ma Singapore na manumalo ai Samoa 63-49. Ua mae’a ai taumafaiga a Samoa i le lalolagi, ua tulai ai le ‘au i le tulaga 13. O le taaloga faaiu na manumalo ai le Silver Ferns a Niu Sila 52-51 ia Ausetalia. I le tulaga tolu na manumalo ai Egelani ia Aferika i Saute 58-42.
Eseesega o Tupe Maua o Taaloga
Na faitioina le matua leai o se seleni mo le siamupini o le World Cup, o le ‘au lea a le Silver Ferns a Niu Sila. Faatusa lea i le taaloga o le kilikiti lea na faatoa mae’a foi le latou Ipu o le Lalolagi na tu lua ai Niu Sila, e ui na tu lua NZ ae $3 miliona Niu Sila na maua e le ‘au a le Black Caps. Na matuā faitioina ai e le toatele le leai o se seleni na maua e teine netipolo a le Silver Ferns.
E mafua mai ona o le eseese mamao o nei taaloga e lua. E ui na manumalo le Silver Ferns ae e matua eseese mamao foi tupe na maua mai i faasalalauga ma pisinisi lagolago e le pei o le kilikiti e faitau 100 miliona tupe e maua mai i le faasalalauina o le taaloga i televise. O le taaloga kilikiti e tele atunuu tetele e auai e pei o Pakistan, Initia, Sri Lanka ma Bangladesh. E lē o mafai e le netipolo ona faatosina mai tamaitai o ia atunuu e taaalo i le taaloga, semanu, e faaluaina le tele o lana maketi.
Peitai o lea ua amata ona silasila i ai le netipolo ise fofo o lea faafitauli. O lea ua faatoa amata ona atina’eina le taaloga e ala lea i le auai o ‘au a tama i totonu o taamilosaga a le lalolagi. Faatusa lea i le lakapi ma le liki, ma le kilikiti foi ua leva ona atina’eina lea tulaga, i le auai lea o tamaitai i taaloga. Ae pau lea o le vaega faato’a mafai ai ona faaleleia ma tele ai le tupe a le netipolo e maua, pe a tele atunuu e aui i le taaloga ae maise o le atina’eina o ‘au a tama.
O lona uiga e fai lava si umi o faatali le Silver Ferns a Niu Sila mo se aso totogi. E ui i lea, o lea ua amata le atina’e fou mo le Neti Polo a le lalolagi.
Faatulagaina o ‘au netipolo a le lalolagi
1 New Zealand
2 Australia
3 England
4 South Africa
5 Jamaica
6 Malawi
7 Uganda
8 Zimbabwe
9Trinidad & Tobago
10 Northern Ireland
11 Scotland
12 Barbados
13 Samoa
14 Fiji
15 Sri Lanka
16 Singapore
