O se finagalo lea o lē o loo agaia galuega a le Minisita o Tupe i le vaega faaupufai poo le Itu Agai, le Tautua Samoa, le afioga lea a Afualo Dr Wood Salele, i le seleni lea ua folafola mai e le Minisita o Faatoaga, le Afioga Le Mamea Ropati ua taulimaina e le Malo mo atina‘e o faatoaga.
Faaalia e le Afioga Afualo o lea faato‘ā mae‘a faalauiloa mai le tusigaigoa a Samoa na faatautaia i le tausaga na tea nei, na faamautu mai ai e na o le 22% (pasene) o tagata Samoa ua faatautaia faasolo atoa atina‘e o faatoaga pe ua faia ia faatoaga ma lafu manu o ni atina‘e faapisinisi.
O le toatele o tagata Samoa e lē o toe fia foi e atia‘e ni tamaoaiga o Samoa e ala i faatoaga.
“E ala lava ona toto faatoaga a tagata Samoa ma fai a latou fagaga ona o le tausiga o aiga ma faalavelave, ae e lē o toe iai se manaoga o le toatele e agai e toe galueaina le fanua ona o ni atina‘e tau tupe maua,” o le saunoaga lea a Afualo.
“Ua manino mai lava i suesuega a le Ofisa o Fuainumera Faamaumauina i le tusiga igoa lea, e lē o toe faigofie i tagata o lo tatou atunuu ona toe agai e atina‘e faasolo atoa faatoaga”.
Ta‘ua e le alii faipule, o loo ua agai tagata i nofoaga tutotonu e pei o le taulaga, ua galulue faaofisa ma isi galuega e maua ai le totogi i vaiaso pe o le tailua vaiaso foi.
Ua faalagolago foi nisi o aiga i tupe faamomoli mai fanau o loo galulue i fafo ma ua saili isi auala e maua ai le tupe auā e fai o le faigata o le toe gagau o le vao, o le tau e faatino ai atina‘e nei, o tagata e galulue ai i ia faatoaga ma lafu manu poo atina‘e o faigafaiva foi, ae o le taimi e tau faatali ai le fua mai o seleselega, a tuufaatasi, e matuā faigata lava ona faaauau lea tulaga.
Faaalia foi e Afualo, o le unai a le Malo e pei ona iai tupe sa faaagaga mo faifaatoaga i tausaga ua mavae na vaaia ai le itu lenei, e tumutumu atu lava faifaatoaga i le taimi e tufa ai seleni nei e fesoasoani ia latou atina‘e, ae uma loa le tupe, uma foi ma le fia iai o le toatele ma toe lafoai ai foi lea o fanua.
E toaitiiti lava la o loo faaauau lenei galuega tele ma o loo ua faaaogā lava a latou tupe i le tele o nei tausaga ina ia mautinoa e tumau le lelei o atina‘e auā le faatau atu i le atunuu.
“E sili ai le ave sa‘o lava o le tupe lenei ua folafola mai e le Malo o le a faasafua i atina‘e o faatoaga eseese, i tagata nei o loo faatinoa atina‘e mo pisinisi auā e faaauau mo tausaga e tele a latou taumafaiga,” o le saunoaga lea a le alii faipule.
O le tele o nei tagata ua agai e nono mai seleni e faatino ai atina‘e ma ia mautinoa e tumau le lelei o nei atina‘e i aso ma taimi faigata o le tausaga.
O loo faaauau ona taumafai le Malo ina ia faatosina le atunuu e agai i le eleele auā le faaauau ai o le maua e Samoa o se tamaoaiga mai i faatoaga ma faigafaiva ma ua agai foi afioaga e saili lava a latou maketi mo le unaia o nei faatoaga.
Peitai na ta‘ua e le alii faipule e mautinoa lava, a lē malosi ma faaauau ai pea la le aumai o tupe faapenei, ailoga a toatele nisi e faaopoopo i le numera o faifaatoaga faipisinisi i totonu o Samoa.
O le fesoasoani lenei e $13 miliona tala Samoa o le $5 miliona ua aumai e le Faletupe o le Lalolagi (World Bank) e lē toe totogia, ae o le $8 miliona tala o loo faamatuu mai o se nonogatupe.
