O le taimi muamua lenei i talafaasolopito o le Pasefika, ua auai mai ni tama o le Pasefika i se polokalame faaleaoaoga mo le taaloga o le lakapi e faia lea i Niu Sila.
O le kamupani telefoni a le Digicel o loo latou lagolagoina le auina mai o tama mai atunuu o le Pasefika, mo lea polokalame tāua, le International Rugby Academy NZ (IRANZ).
O le Digicel Pacific Rising Rugby Stars, ua amataina lea faiga mo se lelei ma le atina‘eina o agavaa o tama i se tulaga maualuga o le a iai i le taaloga lakapi. Sa faamaonia i se pepa o faamatalaga mai le kamupani a le Digicel, o le taimi muamua lea ua auai ni tama taaalo mai le Pasefika mo le polokalame faatulagaina o loo avea ma taiala i le taaloga.
O loo taulai le polokalame i le atina‘eina o agavaa i le galuega faafaiaoga o le lakapi, ma o se taimi tāua tele, ona o le a galulue faatasi ma nisi o faiaoga iloga, faapea nisi o tama sa tautaua ona o le maulauga o le silafia sa faatino ai le lakapi. O nisi o faiaoga ma tama taaalo e pei o Graham Henry, Murray Mexted, Christian Cullen, Aaron Mauger, Craig Dowd, ma le anoanoai o nisi fetu pupula o le lakapi.
O le ‘au o loo aumaia e le Digicel Rising Rugby Stars e aofia ai sui mai Samoa, o le susuga ia Pita Semeane ma Iosefo Ropeti Lafo. O Tonga o Maleko Latu ma Otulea Katoa, o Papua Niu Kini, o Billy Torea ma Christopher Kakah.
E tolu vaiaso o le a faatamoe ai ia aoaoga, ma o nisi o vaega o le a agai le polokalame lava lenei e aofia ai, o agavaa i le faaaogāina o le mafaufau, o le malsoi o le tino, ma le itu tau metotia fou e fesoasoani atili i le atina‘eina o i latou i le taaloga.
O le faamoemoe lava, ina ia toe taliu atu i o latou atunuu ua faatumuina ma faamaonia suiga i nisi o metotia fou ma agavaa e fesoasoani atili ai i o latou lava atunuu.
O le isi vaega o loo laualuga i nei aoaoga, o le fesoasoani i uiga faaalia, ma amioga a tama i taimi e faatino ai le taaloga, e lē gata i luga o le malae, ae o soo se siosiomaga e auai atu i ai.
O le Aso Sa na tea nei na taunuu ai i latou i Palmerston North, ma amata ai lava aoaoga e pei ona sa fuafuaina. Sa faaalia se finagalo o se tasi o Faatonusili o le Digicel, (Pacific Commercial Director) Darren McLean mai Brisbane e faapea, o le ofo alofa ma le agaga fiafia tele o le kamupani, ona o faiga faapaaga ma atunuu o le Pasefika, ua saga faateleina ai fesoasoani a le kamupani mo le atina‘eina o agavaa mo tama taaalo i le taaloga lakapi.
O le a lē gata mo le lelei o tama taaalo lava latou, ae o le a sili ai ona aogā ma fesoasoani i totonu o o latou foi atunuu o loo nonofo ai.
Na ta‘ua e McLean, o le a lē taumatea le telē o se sao ma le aogā o lenei polokalame tau aoaoga, i le faaauupegaina o sui e toaono mai atunuu e tolu, Samoa Tonga ma Ppaua Niu Kini.
Sa faapea foi ona faailoa se finagalo o le faauluuluga o le polokalame (IRANZ Managing Director ), o ia foi o se tama tuai o le All Blacks a Niu Sila, le susuga ia Murray Mexted, e faapea o le polokalame e telē sona aogā.
O vaega uma foi o loo aoaoina, e tutusa ma paleni ona itu uma e manaomia e soo se tama taalo, faapea manaoga o le taaloga lakapi.
O fuafuaga i le mafaufau, o le itu i le faatinoina, (practical and theory) ma e manaomia foi ona malamalama lelei le tama taalo ia te ia lava ma lona tagata.
Sa toe faalautele le finagalo o Murray Mexted, i lona faafetai i le auaunaga ma le fesoasoani a le kamupani a le Digicel ona o le lagolagoina o tama mai le Pasefika, ina ia auai i aoaoga ma le polokalame a le IRANZ.
E lē gata i lea, ae o le agaga fiafia foi, ona o loo iai se nofoaga e agai i ai tama mai le Pasefika, mo le toe aoaoina i agavaa e pei ona manaomia.
O lona talitonuga, o le a avea tama ua auai mai i le polokalame, e fai ma faataitaiga lelei mo le toatele i totonu o latou lava atunuu.
O le Digicel ua faato‘ā sefulu tausaga talu ona amata lana tautua mo lenei itulagi e aofia ai ma le Pasefika, peitai ua silia ma le 11 miliona i latou ua fai paaga i ai, ma o i latou foi ia o loo faaaogāina le auaunaga a le kamupani telefoni.
E anoanoai nisi polokalame o loo ave i ai le lagolago a le Digicel, i le tulaga o taaloga, e lē gata i autaalo a atunuu, ae faapea foi tagata taalo taitoatasi.
